Ka Environment Co-ordination Committee (ECC) ka Sutnga Elaka da thoh ko cha u Deputy Commissioner ka East Jaiñtia Hills wow pyrchah yei chna pyrchah ya ka aiñ ya ki karkhana Coke Plant hapoh ka Elaka Sutnga deiwa dawa wow phah pynsangeh chisyndon ya ini i chna.
Da ong wa ka yurim wa pyrchah toh wa neidaw wym em i leh yeiwa emkaam wow pynkhooid yei jakhlia wa mih na kini ki karkhana iwa da booh hei maa yei chait i khiah ki paidbah wa chong wa sah hajan kini ki karkhana.
Da ong leh wa katkam ka RTI wa da yoh jubab na ka MSPCB, da em du 5 tylli ki Coke Plant ha East Jaiñtia Hills District kiwa da yoh ya ka Consent To Operate (CTO) katwa kiwi kiwa sah da krehkaam ki khlem ka CTO.
Ka RTI da pynyoo ko leh wa em du 12 tylli ki Coke plants na ki 36 tylli kiwa da yoh ya ka Consent to Establish (CTE) na ka MSPCB, katwa kiwa sah da sdang ya ki pyrchah ya ka aiñ.
Kamtæ ka Co-ordination Committee da ong ko wa sñiawkhia ko yeiwa daw chah ktah deiwa em kini ki karkhana iwa nadooh katni kamjooh mynstep mankawi neidaw kiwa mih na kini ki karkhana deiwa thang mooyong da pynmih ya ka Carbon Monoxide, Carbon Dioxide, Sulphur Oxide wa kiwi kiwi de kiwa ktah ya u bru.
Da ong ki leh wa ini i chah ktah ki bru da yoo nadooh wa katni deiwa yoh ki yei kjut khlieh, i tlot bor wa kiwi kiwi de. Wei deiwa pteiñ u chah yeini daw ktah ko yeiwa ye u riñ mynsien, i bor jabieñ, u klong snam, i haap khon nadooh wa poi leh chei yap.
Chooh chooh da ong wa ini waroh man i ym du iwa pyrchah ya ka aiñ man i leh pyrchah ya ka riti synchaar ka ri namo ka Constitution heiwa hapoh ka Article 21 da e yei hok wow im wei da booh ko haneiñ yei mynsien bru bar yei kaam kamai kajih.
Da ong leh wa kam ki tre chnong da im ki na iwa e ka rymaw wa i rep i riang waka dustur riti u warim wa jah iwa da yoh yei yada hapoh ka 6th Schedule ka Constitution.
Kamtæ ka Environment Co-ordination Committee, Elaka Sutnga deilang wa ki Waheh Chnong ka Elaka neibynta ki Dorbar Chnong da kyntu ki ya u DC wow chimkhia ya ini i kaam yow yada ya ki bru ka Elaka Sutnga.
