Chibynta wow pynkhreh ya ka lehniam Behdieñkhlam yong ka Raij Jowai, ynne i step ka Dorbar Niam da pynehnrngu ko ya kiwa kitkaam chnong ki khon ka Raij wa kiwa kitkaam ya ki Seiñraij kiwa hapoh ki thawaner ka Raij deiwa pynman ya i e-ngooh e-dem wa kyrpang ha Yung Langdoh, Loomiongkjam, Jowai.
Ha ini i ngoohblai pynehrngu da wan chimbynta da ki waheh chnong wa ki Secretary chnong, ki waheh wasian, kiwa kitkaam ki Seiñraij wa kiwi kiwi kiwa kitkaam niam ka Niamtre hapoh ka Raij.
Neiliang u Dolloi ka Elaka Jowai da ong u wa ini i pynehrngu ya kiwa kitkaam chnong toh kam chibynta wow pdiang ya ka lehniam Behdieñkhlam wei wow e-ngooh e-dem ya ki Blai ki Syiem wow e-bor, e-mynsien ya ki kam ha kini ki por wa em ka khlam COVID-19.
Da kyntu u leh ya ki khon ka Niamtre wow bood ryntih ki ya ki kyndon wa da pynkhreh da ka Seiñraij heiyatoh wa ka lehniam Behdieñkhlam kawa daw pynman ha kini ki tayaw wa daw wan wei ya kini ki kyndon da e-kti ha ka sorkar wow pdiang ko ya ki.
