Kam chibynta wow yaleh pyrchah ya ka khlam COVID-19, da pynman ya ka pynsñiawthooh paidbah (Awareness Programme) ya i emkaam wow e tika yada na uni u khñiang ynnin ka sngi ha Kyndongtuber, West Jaiñtia Hills.
Ya kani ka pynsñiawthooh paidbah da pynman hei yakrehlang wa ka yung krehkaam u Block Development Officer ka Laskein wa ka Medical & Health Officer, Mynso PHC heiwa ka Dr. R. Inbuon, Medical & Health Officer yong ka Mynso PHC da pynche ko ya i emkaam i tika cha ki Village Covid Management Committee yong ka chnong Kyndongtuber, kiwa kitkaam ya ki niam na ki Balang Kristan kamjooh na ka Seiñraij Niamtre Kyndongtuber, wa ki President wa Secretary yong ka VO, Kyndongtuber.
Ha kani ka sngi da yoh yei batai wa che bha hajrong i emkaam wow chim ya i tika wow yada na ka khlam COVID-19.
Hadien ini da em i phyllu yumut wa kiwa wan cha kani ka pynsñiawthooh kiwa da kylli yeiwa artatien ki wei da yoh leh i pynche na ka Doctor hajrong iwa kylli ki heiwa da pynrap ko leh wa hapoh ka PHC da em boon kiwa chong chnong kiwa da wan chim tika wei da e nongmuna ko leh ya ka chnong Mynso wa kiwi kiwi.
Ha kani ka sngi da emlang leh u BDO ka Laskein Block u Dr. Brightstar Langbang, u Waheh Chnong ka Kyndongtuber u Shiva E. Siangshai wa kiwi kiwi.
Neiliang u BDO da kyntu u ya ki paidbah wa chong chnong ka Kyndongtuber kiwa dadap palat 18 snem wow wan ki chaphrang wow chim ya i tika khnang wow yoh yei yada wei wow lait u chah ktah ware ha u khñiang COVID-19 lada jia wa yoh ya uni u khñiang.
Da kyntu u leh ya kiwa chong chnong wow deiñ ya ki Mask wei wow bood ya ki kyndon yada na u COVID-19.
