U Montri wa pait ya ka chnat PWD (Roads) uwa man leh u Symbood Montri Rangbah, u Prestone Tynsong da ong u wa i pynheh ya u sarok Shillong-Dawki u lai bait ko na u jooh u sarok kamwa da dep pynkhreh. Ini i ong u Prestone toh hadien wa em i pyrchah yei pam dieñ kseh bilat kiwa em ha Upper Shillong.
Hawa pynche hajrong itai i pyrchah, u Prestone da ong u wa ka sorkar da yohbor ko hachwa wow lai chakhmat ya i kaam, deiwa pynrap wa katkam ka Forest Conservation Act, ka sorkar da dep ko wow su ya ka bai lutsan nei dooh noh ki dieñ ha Upper Shillong, deiwa e thaw won ya ka chnat khloo cha West Khasi Hills wow thung ya ki dieñ kiwa da chah pynhaap. Da ong u wa toh i kaamram yong ka yung krehkaam u Divisional Forest Officer wow pait wei pynbiang hawa yatoh wa i pam ya ki dieñ.
Da ong chooh chooh wa hanla ka sarok u lai ko chakhmat kamwa da pynkhreh, tangwa neiliang ka chnat PWD daw pyntikna ko leh wa wym pynsih ko ya ka rymaw. Da ong u wa hadooh katni i kreh ya katai ka sarok dang lai ko wer wer neibhah wa da kreh du kamwa 8% neidaw wa em ka Lockdown, tangwa da pynsñiaw u leh yei kyrmen wa manda lai bait i long i man ha ka jylla, daw ye u pynsmat ya i kaam neibhah ka Company kawa pynkreh leh da phah ya ka wow pyndep smat katwa ye.
Hawa kylli hajrong i chah ujor hapoh ka Meghalaya High Court, u Symbood Montri Rangbah da ong u wa ka sorkar da dep ko wow pynbiang lut ya ki kot ki sla hawa yatoh wa itai i pynkreh cha ka High Court.
