U District Magistrate ka West Jaiñtia Hills District da pynmih hukum u ynne ka 26 tarik yow pteiñ ya ki Containment Measures yow kdoh u khoom yei poor ka khlam COVID-19 hapoh ka District hadooh wa pynbna da kamwi.
Ka Corona Curfew u krehkaam ko nadooh 5:00 waje i miet hadooh 5:00 waje i step nadooh ka Monday hadooh Friday.
Ka Weekend Lockdown ha ka sngi Saturday wa Sunday hapoh waroh kawi ka District u krehkaam hi ko deiwa pynlait ya kiwa kit ya ki mar wa emkaam wa ki kaam sumaar sukher.
Ki kaam wym chah u leh:
Waroh ya ki thaw puræ puthi, ki thaw e sikai u man ki kiwa khang tangwa da toh u leh ki ya i e sikai lynga ka Online Class.
Ym pu chah wow pynman ya kiwon kiwon ki jait yalang paidbah kamjooh ym chah wow pynman ya ki bia.
Ki yalang hawa em i yap bru u chah wow em du 10 ngut ki bru deiwa yohbor na u DC lane na u SDO (Civil) Amlarem katkam i emkaam.
Ym chah yei psiah kiwa uiñke suwari kiwa na baar jylla wei waroh ki thaw uiñke suwari u man ki kiwa khang.
I khayi pateiñ khappood ha Tamabil Dawki u man i iwa dang khang hi.
Ki yaw wa pynman chisien chi tayaw u man ki kiwa khang, ym pu chah leh wow wai ki yungmane.
Waroh ki yung krehkaam ki bru samen u man ki kiwa khang lait noh kitu kiwa leh ya ki kaam wym hoi u dam namo ki Essential Service. Ki yung krehkaam sorkar pyrdi ki wym toh kiwa emkaam toh u man ki kiwa khang wei ki wakreh u kreh ki na yung.
I lai i wan cha kiwi ki jylla u man i iwa khang lait noh ya ki kari wa lai luti cha Assam/Tripura/Manipur/Mizoram. Kini ki kari ym chah wow sangeh ki ha ki thaw wa man chnong ha tymud u NH-06 uwa haap hapoh ka West Jaiñtia Hills District.
I lai cha kiwi ki District kamjooh pynhapoh ka District dang man i iwa khang lait noh kitu kiwa da yoh bor wei lada emkaam jhan ye wow leh ya ka ‘EPASS’ naka website www.megedistrict.gov.in. Da khang leh yei lai i wan wa khlemkaam wei kitu kiwa thok yei daw wa mih ki daw pynchitom katkam ka aiñ.
Ki kaam wa chah:
20% ki dukan u chah u wai ki ha Iawmusiang, CNI Market, Yaw Chyiap (JPC Market) wa ha Iawthymme, Ladthadlaboh, Jowai deiwa pynbait ki Market Committee nadooh 9:00 waje i step hadooh 3:00 waje i janmiet. Ha ka sngi Monday toh u wai du ki dukan wa em ya u Number 1 wa 4, ha ka Wednesday 2 wa 5 katwa ha ka Friday 3 wa 6.
Ym chah wow chongdai ha ki luti lai kjat, toh u booh ya ki Volunteer wa ki wakreh wow pait wa deiñ Mask waroh wei da leh yei yajngai uwi ya uwi. Hap leh wow booh ya ki thaw sait-kti wa ka um wa kai ha ki thaw wa pynman yaw. Lada em ki wym bood kyndon daw chah khang ki dukan hadooh ka yaw leh khlem da pyntip chwa.
I wai ki dukan dai marbaam (Retail Shop) kiwa em ha ki dong/chnong toh ha ka sngi Tuesday wa Friday nadooh 9:00 waje i step hadooh 3:00 waje i sngi ha ki thaw wym em pynman Containment.
Ki dukan (Wholesale) wa dai marbaam mardih wa emkaam wa em ha chnong Jowai (ki wym em hapoh ki thaw pynman Containment), Mihmyntdu, Ialong wa Amlarem u wai ki ha ka sngi Monday wa Thursday nadooh 9:00 waje i step hadooh 3:00 waje i sngi. Ha Thadlaskein Block wa Laskein Block ha ka sngi Wednesday nadooh 9:00 waje i step hadooh 3:00 waje i sngi.
Ka yaw Lay By Market wa em ha Ialong u wai ko ha ka sngi Tuesday wa Friday nadooh 9:00 waje i step hadooh 3:00 waje i sngi heiwa u District Horticulture Officer wa ka Market Committee daw pynbait ki yei rukom wai ki dukan wei da e bor wow e thaw chongdai ya kitu kiwa da yoh ya i tika kammon la kammon chisien. Ki kari wa kit mar Wholesale ym chah wow psiah ki chapoh ka chnong Jowai.
I wai ki dukan Hardware, ki dukan dai pyrthap ha ki chnong wym em wa chah ktah ha u COVID-19 toh kiwa da chah u wai ha ka Monday wa Thursday nadooh 9:00 waje i step hadooh 3:00 waje i sngi.
Ki Hotel, ki dukan ja, ki dukan cha u krehkaam ki deiwa song baam donhi ym chah wow chong baam.
Ki kaam chna yung, chna sarok wa kiwi kiwi toh deiwa bood thij ya ki kyndon.
Ki Bank, ki Post Office wa ki Telecommunication Service u krehkaam ki deiwa pynduna bru wakreh.
Ki Courier Service toh kiwa chah u leh deiwa bood ya ki kyndon.
Ki yung krehkaam sorkar jylla wa pyrdi u krehkaam ki katkam ki hukum wa da pynmih.
I wai ki dukan wa dai ya ki tiar ki tar wa yatoh wa ki kaam rep, ki sboh, ki symbe wa kiwi kiwi toh iwa da chah wow wai ha ka sngi Monday wa Thursday nadooh 9:00 waje i step hadooh 3:00 waje i sngi deiwa yoh bor chwa na u DC lane SDO, Amlarem katkam i emkaam.
Ki thaw wa leh Welding namo ki Steel Fabrication toh u wai ki katkaam i emkaam ha ka sngi Tuesday wa Friday nadooh 9:00 waje i step hadooh 3:00 waje i sngi deiwa yoh bor na u DC lane na u SDO, Amlarem.
Ki karkhana chna kari, kiwa dai tiar kari u chah u wai ki katkam wa emkaam deiwa yoh bor na u DC lane u SDO, Amlarem.
Ki kaam rep wa kynthup ya u kwai wa u pathi toh iwa chah kamjooh ki kaam MGNREGA ha ki thaw wym em kiwa chah ktah ha u COVID-19 wa kiwa em cha baar ki Containment Area. Kamjooh ki kaam psan mrad wei i kit ya ki baam mrad.
Ki DRDA wa C&RD Block u krehkaam ki deiwa pynduna bru wakreh.
Da chah wow mih kamai 20% ki kari kamai deiwa kitbru ¼ na iwa hoi nadooh 9:00 waje i step hadooh 3:00 waje i sngi deiwa bood ya kini ki ha wah:
- Ha ka sngi Monday u chah du ya ki kari wa em ya u Number 0 wa u 1.
- Ha ka sngi Tuesday u chah du ya ki kari wa em em ya u Number 2 wa u 3.
- Ha ka sngi Wednesday u chah du ya ki kari wa em em ya u Number 4 wa u 5.
- Ha ka sngi Thursday u chah du ya ki kari wa em em ya u Number 6 wa u 7.
- Ha ka sngi Friday u chah du ya ki kari wa em em ya u Number 8 wa u 9.
Lait na kini ki kari, ki kari ki bru samen ym chah wow lai wow mih ki cha sarok lait noh kitu kiwa em ya ka ePass wa e da u Deputy Commissioner.
Kiwi ki kaam wa da chah ini wa dep u pteiñ hi ki kamwa jooh hi.
