Ki dkhot ka Meghalaya Bharat Scouts & Guides, West Jaintia Hills District wa kynthup ya u Ohiwot Laloo, District Secretary wa u Elvis Dkhar, District Organiser Scout ha ka 25 tarik da pynman ki i saam ya ki Mask wei pynsñiawthooh ya kiwa chongdai ha Iawmusiang, Jowai chaphang ki laad yada nei poor yong u khñiang khlam COVID-19.
Kam wa pynkynmoo wa ka seiñ Meghalaya Bharat Scouts & Guides, West Jaintia Hills ha ka thong wow yakrehlang wa ka sorkar heiyatoh wow yada nei poor yong u khñiang COVID-19 da jooh pynman ko ya kam kini ki kaam yarap nadooh wa sdang hi i wan yong kani ka khlam hapoh ka jylla wa ka District.
U Ohiwot Laloo, District Secretary MBS&G, West Jaiñtia Hills hei yaklam da khanna wa ha kani ka sien da leh biang yeini toh kam chibynta wow kyrsu kyntu ya ki paidbah yow lait ki nei chohtyndep i man lane u kheiñstiñ ya kani ka kjut wei wow kynmoo leh wa i bood næ ksoh ya ki hukum, adong ka sorkar toh iwa emkaam wei da leh yeini i saam Mask wei pynsñiawthooh deiwa lai na kawi ka dukan cha kawi ka dukan.
