Ka Additional Chief Secretary ka jylla Meghalaya ka Rebecca Suchiang u chimkti noh ko kam ka CMD wa thymme ka MeECL da pyntip u Montri Rangbah ka jylla u Conrad Sangma ynne ka sngi deiwa khana wa ka hukum neiliang yong oo da dep phah u nadooh ka 25 tarik uni u bnai.
Ka Rebecca Suchiang u chimkti noh ko na u CMD warim u Arunkumar Kembhavi.
U Conrad hawa pynbna ya ini da ong u wa da yooluti wa deiwa chimkti da ka Suchiang daw ye wow yarap ya ka MeECL wow yaleh yei dooh nong wa da antaad wow poi T. 900 klur ha uni u snem mang tyngka heiwa da pyntip u leh wa da mynjur ya i pyrtuid ki bru wow leh ya ka takit wa laitlooid hajrong ki kaam ka MeECL.
Hajrong i thung ya ka CMD wa thymme, u Conrad da ong u wa ym toh deiwa yooluti wow wanrah yei kylla wut wut du hapoh chi sngi ar sngi. Tangwa da ong u wa da yooluti wow ye u booh lang ki bru wakreh kiwa khlan wei da man ko leh kawa da heh kawa pait leh ya ka muna tyngka kamtæ daw em i ya krehlang deiwa pynrap wa yooluti wa daw lai chakhmat deiwa bha.
Da ong u leh wa ini ym em mut wa ym em biang i krehkaam u CMD warim neibhah ini i kaam ym toh iwa suk wei da hap leh wow chim ya ki rai wa khor heiwa ka sorkar da dep ko leh wow chim ya ki rai ini wadep wei ha uni u snem mang tyngka da antaad wa ka MeECL daw dooh nong ko T. 900 klur wei ini ym kylla i du deiwa kylliang ya uwi u bru wei da yooluti u wa manda lai chakhmat daw tip kammon wow leh.
Kamtæ da ong u wa ha kini ki 8-9 bnai ka MeECL daw chem chitom bha ko heiyatoh wa ki kaam poisa poilaiñ kamtæ da emkaam bru wa da heh kyrdan wei kawa emkti leh ha ki kaam poisa poilaiñ ha kini ki por yow yahluti deiwa ya krehkaam lang waka chnat poisa, da ong u leh wa ka Suchiang leh toh kawa da khia yukit kawa pait ya kiwa boon ki chnat wei daw pait won da uyi u jied yow man kam u CMD wa pura ka MeECL neibhah emkaam ya uwi u bru wow chong u pait du ya ka MeECL.
