Kiwa nyngkong dooh ki 5 lak ngut kiwa uiñke suwari kiwa wan chapoh India manda chah ya ki, daw yoh ki ya ka Tourist Visa dei mynkna katwa ya ki Travel Agent wa ki Tour Guide wa da tipmit da ka sorkar daw ye ki wow yoh ya ka ram wa hadooh T. 10 lak wa T. 1 lak.
Ya ini da pynbna da ka Union Finance Minister ka Nirmala Sitharaman kam chibynta wow yarap ya ki bru wa em ha ki kaam uiñke suwari kiwa da chah ktah bha ha ka khlam COVID-19.
Ha chwa ka khlam ha u snem 2019, da em kamwa 1.1 klur ngut ki bru wa na baar ri kiwa da wan chapoh ka ri India kiwa da pynlut $30 Billion ha i lai uiñke deilang wa ka khayi pateiñ.
“Deiwa kheiñlang i rukom sah kiwa wan na baar ri, da sah ki ym duna ya ka 21 sngi wei uwi pa uwi da pynlut u kama T. 2,400 chi sngi. Manda wai biang ya ka ri, wei i e Visa leh sdang i, ki 5 lak ngut kiwa uiñke suwari kiwa wan nyngkong dooh daw yoh Visa ki dei mynkna,” da ong ka Sitharaman.
Ini i e Visa toh i chisien donhi cha uwi pa uwi wa psiah chapoh ka ri wei ini daw wanrah ko leh yei dooh nong iwa kamwa T. 100 klur wei u pteiñ ko hadooh ka 31-03-22 lane hadooh wa poi 5 lak tylli ki Visa kiwa da dep e.
