U President ka Hill State People’s Democratic Party (HSPDP), u KP Pangniang ynne ka sngi da lai booddien u ya i e yumut ka Party heiyatoh wow pynkylla noh ya ka Sixth Schedule yong ka Riti Synchaar ka ri India, khamtam ha ka para 12A (b) deiwa pyndam noh ya i kyntien ‘President’ deiwa kylla noh cha i kyntien ‘Governor’, iwa mut wa da ebor ha u Lat ka jylla wow pyndam u pynkrehkaam ya ki aiñ ka sorkar pyrdi ha ka jylla.
Da pyntip u wa ha u snem 2019 ka HSPDP da tyrwa ko ya i yumut lyngba u Montri Rangbah cha ka Parliamentary Standing Committee hajrong ka Sixth Schedule, deiwa ong wa kamwa man katni ka bor chna aiñ ka jylla dang chong i ha Delhi, deiwa pynkynmoo wa ka Para 12A (b) kamwa man katni ha Assam toh u man kamjooh ha Meghalaya.
Da ong u leh wa ka Party daw pynkynmoo biang ko ya u Amit Shah lada wan u cha Shillong hajrong ini wei wow pynkynmoo wow pynkrehkaam noh ya ka Inner Line Permit ha ka jylla, kamwa dadep mynjur hapoh ka Yung Dorbar Chna Aiñ ka jylla.
Chooh chooh da sñiawkhia u leh yei wym kynthup ya ka ktien Khasi wa Garo ha ka Eight Schedule ka Riti Synchaar ka ri India deiwa ong wa kam ka jaitbru wa kyrpang, ka HSPDP leh dawa ko ya ka Khasi Jaiñtia State, tangwa lada ye wow kynthup chwa du ya ka ktien Khasi ha ka Eight Schedule daw man ko chibynta wa da tipmit ka sorkar India yei man kyrpang ka jaitbru.
