Ka Dorbar Chnong Tympang Iawmusiang, Jowai ha ka Wyrta wa phah da u Waheh Chnong, da ong wa u DC ka West Jaiñtia Hills na ki por cha ki por da khang u ya kiwa chongdai madan ha ki luti lai kjat (Footpath) ha Iawmusiang neidaw wa boonsien booh ko hei maa wei mynsoo kiwa lai wa wan.
Kamtæ katkam ka hukum wa da pynmih ha ka 3 tarik uni u bnai da u DC, da phah ya waroh kiwa chongdai madan nadooh kiwa chongdai cha ki luti lai kjat wow kyrriah ki cha i thaw wa da booh ya ki ha Iaw Seiñriaj, Iaw Chor (CNI) wa ha i thaw pynyieñ kari ka MTC, Iawmusiang Jowai.
Katwa kamtæ neiliang ka chnong da kyntu ko ya kiwa thied tiar waroh wow thied ki du na kini ki thaw wa da booh wei lada chem ya kiwa leh pyrchah lane kiwa dai ha ki luti lai kjat, ka chnong daw pynchitom ko ya ki katkam ki aiñ yong ka chnong.
Neiliang ka chnong kamwa krehlang wa ka sorkar da kyntu ko leh ya kiwa chongdai wow pynyoo (Display) ha ki dukan yong ki lada man ki kiwa da dep yoh tika namo ki wym pu em yoh tika (Vaccinated lane Not Vaccinated).
Neiliang ka chnong da yooluti ko leh yei ya krehlang i yong phi kiwa chongdai waka chnong wei da e khublei ko leh ya u Deputy Commissioner wa da chimkhia u wow pynyoh ya i thaw neibynta kiwa chongdai ha ki luti lai kjat.
