Ki wakreh ka GHADC hapoh ka lama ka Non-Gazetted Employee Association (NGEA), Tura toh kiwa da dep yakhih yow pyndam noh ya ka Secretary ka GHADC ka Rikse R. Marak wei hadien wa pynman ya kiwa boon ki yakhih, ka Executive Committee wa thymme wa yahkhmat da u Chief Executive Member u Benedic R. Marak, da ap u yeiwa dawa ka NGEA heiwa da pynlait noh ya ka Rikse R. Marak nei kyrdan yong ka kam ka Secretary ka GHADC.
Ka NGEA da pyntip ko wa ya ka Rikse R. Marak da pynlait ya ka nei kaam yong ka ha u Naisan 2021 wei da pynemkaam ko ya ka kari ka GHADC ka Scorpio kawa em ya u Number ML-08G-3051, tangwa ya kani ka kari hadien wa pynlait ya ka Secretary nei kaam ko, kani ka kari won da chem toh kawa da ieh ha Police Station nadooh u Naisan hadooh katni.
Kiwa yahkhmat ka NGEA da paan ki yei pynche na ka Police Station wa lada em iwon iwon i takit wa yatoh wa ka kari heiwa da pyntip wa ym em iyi iy leh. Kamtæ da ong wa lada ym em iyi iyi leh wa yatoh wa ka aiñ, iyi i daw wa da booh ya kani ka kari ka GHADC ha Tura Police Station.
Ki Executive Member ka NGEA da lai pyntip ki ya ini cha u Joint Secretary ka GHADC uwa pait leh ya ki kaam kari (Transport) tangwa oo leh ym tip u iyi iyi leh chaphang ini i kaam, wei ym em leh yoh u ya ka chithi wa da ieh noh ka Rikse R. Marak yei kaam yong ka.
Kamtæ ka NGEA da paan ko yei pynche na ka Executive Committee ka GHADC wa hapoh i yong i pyrtuid lane kiyi wa ksoh ya kani ka Scorpio kawa da booh ha Tura Police Station, wei lada kani ka kari toh kawa dang mantre da ka GHADC. Neibhah ka GHADC toh ka yung krehkaam neibynta ki paidbah, neibynta ki jaitbru ri-loom yow yada yei hok wa i dustur riti yong ki kamtæ iwon iwon iwa yong ka GHADC man i leh i yong ki jaitbru wa ka GHADC yada ko.
