Ynne ka 5 tarik toh kawa da pynkrehkaam ya ka hukum ka High Court ka Meghalaya ha West Jaiñtia Hills kawa da phah ya waroh ki dukan, ki kari kamai wa ki yung krehkaam wow pynyoo ki da ki dak deiwa thoh lada toh kiwa da dep yoh tika (VACCINATED) lane ki wym pu em yoh tika (NOT VACCINATED).
Ynne ka sngi leh da man ko ka sngi wa chah u wai dukan wei wow chongdai ki bru ha ki yaw wa em ha Jowai. Tangwa ha kiwa boon ki dukan wa kamjooh ha ki kari kamai, duna kiwa bood ya ka hukum wow pynyoo lada toh kiwa da dep yoh tika lane ki wym pu em.
Ki Magistrate ka District hawa lai booddien yei krehlang ki paidbah namo ym em, da pyntip ki wa hadien wa em kiwa ong wa ym yoh por wei em ki wym tip yeini, kamtæ da e por biang hadooh ka 7 tarik wow chah u leh yeini kam ka laad khaddooh wei ya kitu ki wym leh yeini daw chah khang dukan wei ym chah wow kamai ki.
Ki Magistrate da khang tala ki leh ya iwi i dukan dai cha ha Iawmusiang wa chah ki ya ki bru wow chong baam ki neibhah ka hukum u DC da chah ko du wow song baam donhi.
Heiyatoh wa ki kari kamai, ki Magistrate da pyntip ki wa da dep ki wow chon (Print) ya ki kot wa thoh VACCINATED wa NOT VACCINATED wei da dep wow saam cha ki chwa ynne ka sngi tangwa da chem wa kiwa boon hi ym em wa pynemkaam ya kini ki kot. Kamtæ da saam biang ya kini ki kot cha kiwa kamai kari.
Ki dukan ki wym em pynyoo yeiwa da yoh tika lane ym pu em, da phah khang leh ya ki ynne katwa ym pu leh ki yeiwa emkaam.
