Ka National People’s Party (NPP) ha ka kyrwoh wa phah da uwa e ktien ka Party u Marcuise N Marak, MLA da ong wa da yoo chutia wei yoo kyndeh wow pait kammon wa u Mukul Sangma mih u na ki por cha ki por khlem da biang yukheiñ ki sabut du wow yoh u mih khubor deiwa khana da iwa thok. U Marcuise da ong u wa ha kini ki por wa ka sorkar da pyrchang ko wow yoh biang ya ka ram wa dang sah wei wow pynbait ya waroh ki rai bakla heiyatoh waka poisa poilaiñ kiwa da chim hapoh ka Congress, heiwa u Mukul da pynkit u ya iwa man katni cha ka sorkar MDA heithaw wow leh u kam uwa em yei bahkhlieh wei ymtoh wow mylliñ u yeiwa da leh u iwa da booh ya ka jylla hei chitom katni hawa yatoh wa ka poisa.
Ka NPP da ong ko wa heipor ka sorkar Congress, i pynlang dan toh iwa duna dooh iwa da wanrah yei dooh nong da ki spah klur iwa da kdaw leh da kiwa boon ki CAG Report kamjooh ki Departmental Report, kamtæ u Mukul toh u chim u yei kitkhlieh wa da leh bakla u. Boi ye u man wa ka Congress da jngai ware ko na ki kaam synchaar khadar da boon sngi hadooh wa da mylliñ lut ki yei leh bakla ka sorkar ki wei da toh wow pynkynmoo biang ki ya idæ.
Hajrong ini da ong wa hapoh ka sorkar MDA, i lum dan da ku ko da boon boon chah. Ym toh kam ka sorkar Congress kawa da kulmar hadien wa ka laad pynmih poisa ki da chah knieh ko ha ka NGT hadien wa da khang ya i tih mooyong (Rathole Mining).
Ha u snem 2020, ka sorkar MDA da wanrah ko ya ka Meghalaya Settlement of Arrears Act (hapoh ka State Taxation Acts) wei ka chnat sorkar leh da pait bniah ko yow pyntikna wa ym em kiwon kiwon kiwa lait na ka aiñ deiwa khlem su ya i dan. Ka One-time Settlement Scheme (OTS), iwa u Mukul da choh ksiñ u khlem tip iyi iyi leh, neibhah kani ka Scheme pynchlur ko ya kitu ki wym su ya i dan wow wan ki chakhmat wow su 70% deiwa maap ya ka 30% kawa sah. Ini mut wa kitu ki wym su tang chi tyngka leh cha ka sorkar nadooh ki por ka Congress, katni da yoh daw ki wow wan chakhmat yow su pynkhooid ya ka poisa wa sah.
Hadooh kattæ ka chnat sorkar da chem ko ya 50 ngut kiwa heh wa toh u su dan wei da ye wow yoh T. 9.66 klur ka dan iwa ka Congress ym jooh bna ko wow phah su. Sa T. 19.75 klur toh kawa dang sah, wei da booh dei por yow su ya kawa dang sah.
Ka NPP da pynche ko cha ki paidbah wa u Mukul da pynmih u ya chiboon ki pynbaad wa ka sorkar ym em lum ko ya dan na kiwon kiwon ki Petrol Pump hapoh ka jylla. I Petrol wa iwa yoh na ka VAT man ko kam kawi na iwa heh dooh i pynmih poisa ya ki sorkar ha India. Wei da sñiaw chutia wa u Mukul u ong u wa ka sorkar ym em lum dan ko na ki Petrol Pump, iwa da emkaam yow pynskit ya ki kor ka sorkar. Hadien wa ka sorkar da sai ko ya ki yukheiñ iwa pynyoo wa na ki 229 tylli ki Petrol Pump hapoh ka jylla, du 58 tylli ki Petrol Pump wa sah ram heiwa da yoh T. 5.91 klur na ki, wei hadien wa pynche ya ini, u Mukul da wiar u neidaw wym em de iyi iyi wow ong hadien wa da pynyoo yei thok yong oo.
U Marcuise da ong u leh wa kini waroh toh i pyrchang ka Congress wow pynim biang ya idæ kawa katni da sdang pleh sdang wiar. Ka Party toh kawa da dep yap ha ka sorkar pyrdi wa ha kiwa boon leh ki bynta ka India. Wei da kiwa dang sah wa em ki ha Meghalaya, da leh ki katwa ye yow im biang deiwa yah bakla ya ki paidbah. Heijooh i por da ong u wa ini waroh ym toh iwa phylla neibhah ini toh i krehkaam ka Congress nadooh nachwa iwa man leh i daw wa da dooh ko yei bor.
