Ka Hill State People’s Democratic Party (HSPDP) da kyntu ko ya ka sorkar jylla wow thung noh da ka Consultative Committee neibynta wow ye noh u pynbait ya u pood u ang wa ka jylla Assam, heiwa ynne ka sngi u President ka Party da lai ekti u dei thoh ha u Chief Secretary ka jylla.
U KP Pangniang da ong u wa ka Party hadien wa da yoo ko wa daw em i yaklam pynbait noh ya u pood u ang na waroh arliang, da phah ko yei e yumut cha ka sorkar wow chna noh ya kawi ka Consultative Committee wow kynthup ya waroh ki kynhun kiwa embynta.
Da pyntip u wa i kamram yong ka Consultative Committee toh wow phah yutip hawa yatoh wa ki 12 tylli ki thaw wa em ya kajia, wei wow pynbiang ya ki kot dulir wa paka yow pynsakhiat yei mantre ka jylla Meghalaya ya ki thaw khappood, wei kani ka Committee u phah ko leh ya ka bui (Report) cha ka sorkar jylla khnang wow pynyoo wa ka Meghalaya da dep ko wow pynbiang ya iwa emkaam ha i por wa yaklam ki ar jylla.
U Pangniang da ong u leh wa ya kani ka Committee daw phah e yumut ko kiwa ye wow pdiang lang, kammon wow leh hajrong ki thaw kiwa em ha khappood, wei wow e ya ka Report wa i bichaar bniah yong ka Committee kawa toh u pyndep ha i por wa da booh. Da ong chooh chooh wa du wow yaklam pynbait deiwa jhan man ko iwa eh neibhah wa toh i wa da jia da ya kajia kawa da palat 40 snem.
Ha iwi won i liang, u President ka HSPDP da ong u wa i wan yong u Union Home Minister, u Amit Shah ym toh kawa daw ye u pynkut noh ya i yaklam ya u pood u ang, boi ye u wow e yumut wow sdang noh u pynbait ya u pood u ang, wei pynsñiaw u wa i em yong ka Consultative Committee toh yow pynbiang ya iwa emkaam, neibhah i wan u Montri ka sorkar India pynyoo ko wa ka sorkar pyrdi em ko yei thmu wa skem wow pynbait noh ya u pood u ang.
