U MLA ka 2-Jowai Constituency u Wailadmiki Shylla ynne ka sngi da pynlait paidbah u ya 3 tylli ki kari Ambulance lyngba ka SRWP 2021-2022, wei kini ki le tylli toh neibynta ka Synjuk Waheh Chnong Jowai, ka dorbar chnong Ladthadlaboh waka Mukhla Dorbar Pyllun, haka yalang wa pynman ha madan Daimasi, Ladthadlaboh, Jowai.
Chwa u ekti ya kini ki Ambulance da em ka yalang tbian wa pynlai da u Octomewot Lamin, Nominated MDC ka JHADC, heiwa da emlang u Dr. W.R. Kharlukhi, MP ka Lok Sabha, ki MDC ka JHADC wa kynthup ya u Brightstar Chyrmang, u Ailad Bhoi wa u Lakhon Dkhar. Da emlang leh u P.K. Boro, ADC ka West Jaiñtia Hills, u Dr. M. Suchiang, ki bru yong ka chnat i chait i khiah najrong kiwa yahkhmat yong ki dorbar chnong waphær waphær ka chnong Jowai wa kiwi.
Neiliang u President ka Synjuk Waheh Chnong Jowai, u A. Ñiangti, u Vice President u L.D. Lakiang, wa u President ka Mukhla Dorbar Pyllun u Hamran Shylla pynsñiaw ki yei sñiawngooh ya u MLA uwa da e yarap chaki da kani ka kari Ambulance kawa man kawi naki bynta wa emkaam tam hadien i wan ka khlam COVID-19 haka district waka jylla hi waroh kawi.
Khana ki wa hadien i wan ka khlam chem jynjar bha ki wow pynyoh Ambulance yaki paidbah wa chong chnong hei kjut chitom neibhah wa boon ki Ambulance wym lait de ki.
U Dr. W.R. Kharlukhi hawa e yei klam pynsñiaw u yei sarong yaka Khasi Jaiñtia deiwa ong, “I toh kiwa da em chwa katæ ka riti shynchaar paidbah wada pynjooh da ki waheh wasian lyngba ki dorbar chnong wei hadien wa wan ka khlam leh rap pynsuk hi ko wow yakhun”.
Kam u MP ka Lok Sabha khana u wa embhah u wow em bynta haka Committee yong ka Rural Development wei hawa bichaar kiwa yoh COVID-19 yong u snem 2020 da chem wa ka thaaiñ yong i toh kawa duna bha kiwa yoh, wei ong u ini toh lyngba i embynta ki dorbar chnong.
Khana u wa da booh u i kyrpaad ya ka sorkar wow pyrchang thooh ki laad neibynta u e bor chooh chooh yaki chnong ki thaw yow ye ki u kreh yei bor deiwa tip ka sorkar.
U Wailadmiki Shylla hawa e yei klam ha kani ka sngi ong u, wow e yaka Ambulance wym em ware man iwa eh, tangwa iwa eh hi toh wow pynlai pynbiang yei emkaam yong ka iwa man-i-por.
Kamtæ kyntu u wow pynemkaam hok yaka, wei ki paidbah leh wym toh u yooluti ware ki dei makna, neibhah wa daw emkaam phniang najrong kiwi won i emkaam yong ka, kamtæ daw em hi i su tangwa wym sy’ad ware kam ki kari kamai.
“I smat yong nga wow e ya kini ki le tylli ki Ambulance toh wa em o i sñiaw chaniah ha kini kiwa pynlai neibhah wa ye ki u pynlai hei rukom wa biang,”ong u Wailadmiki.
