Ka Dorbar Chnong Mulieh Pyllun lyngba u waheh chnong yong ka, u Roilakson S Suchiang da pynsñiaw ko yei sñiawngooh ya ki kaam wa chlur ki soo ngut ki khynroo kiwa kynthup ya u Waiphangki Pala (Maidong )22 snem, u Thranglut-O-ki Pala (17snem), u Onyxstone Pala (19 snem) wa u Kyrpang-I-man Suchiang na ka chnong Mowkyndeng, West Jaiñtia Hills District.
Kam wow pynkynmoo heini, kini ki khynroo da pynlait ki ya ki ar ngut ki khynnah kynthai wa kynthup ya ka Arkini Suchiang (12 snem) wa ka Finie Suchiang (18 snem) ha i janmiet ka 4 tarik nei ngam ha Syllek Tyngkla, markhap wa ka chnong Mowkyndeng-Mulieh.
Ka Dorbar Chnong da kitbok ko ya kini ki khynroo wow smat yoh ki ya i doh i pran wa chait wa khlan wei da kitbok leh ya ka yung ka sem yong ki wow yoh i chait i tram wei wow yoh ki ya ka mynried kawa tyrchaaiñ neibhah ini i raikut ki wow yarap wei wow pynlait im ya kiwi ki mynsien man ki ka nongmuna ya kiwi tawon wow bood ki.
