Neiliang ka ar seiñ kitæ ka KSU Wapung Unit wa ka MPUF Wapung Unit da yoh ki ka ujor na ki paidbah wa da em kawi ka kudam wa dai khoo da u khoo Plastic, kamtæ ki ar seiñ da lai hiar ki cha katai ka kudam wa tip pyrtuid kam ka M/S. TS Star Moowakhu, Dkhiah West, East Jaiñtia Hills wa mantre da u baar jylla uwa pyrtuid tip kam u Allauddin.
Kini ki ar seiñ da lai pait ki cha kani ka kudam hapoh i yahkhmat u Shwari Ryngkhlem, General Secretary KSU Wapung Unit wa u Samely Siangshai, President MPUF Wapung Unit chirup wa ki dkhot yong ki.
Ki ar seiñ da ong ki wa da chem sakhiat ki toh u khoo Plastic uwa man uwa phær bha na u khoo wa jooh bam, i pyrtuid uni u kho toh u Om Rice wa u Sunrise. Neiliang u tre dukan da khana u wa ya uni u khoo da phah (Supply) cha kiwi ki chnong kam cha ka chnong Lumshnong, Jalaphet Pyrdung wa cha kiwi kiwi. Da khana chooh chooh uni u tre dukan wa ya uni u khoo da wanrah na Guwahati.
Neiliang ki ar seiñ khlem da pynslem da lai booh ki da i thoh cha ka yung krehkaam u Deputy Commissioner, East Jaiñtia Hills yow leh u yeiwa emkaam.
Neiliang u DC da kular u wow phah bru na ka yung krehkaam yong oo yow lai pait lai sylli ha kani ka sngi wow wan.
Neiliang ki ar seiñ katwa ym pu lai pait lai sylli u DC, da lai khang ki ya katai ka dukan wa da booh hei maa wa khroo yei chait i khiah yong ki bru.
