Ka seiñ Ri-loom Jaiñtia Traders Association (RJTA) ha i yahkhmat u President yong ka u Paila Kordor Lyngkot ha kini ki tayaw wa da lai, waroh chi tayaw da yoh ki wow pynsñiawthooh paidbah heiyatoh wa i e tika COVID-19 cha kiwa chongdai ha ki yaw ki haat.
Ka seiñ da ong ko wa ini da man sakhiat iwa eh wow pynsñiawthooh ya ki paidbah neibhah dang boon kiwa tieñ wa sier mynsien, khamtam hawa em ki khubor wa pyntieñ ya ki paidbah. Ka seiñ da ong ko leh ka i e tika COVID-19 toh i mon laitlood yong ki paidbah, ka seiñ ym em pynbor ko ya kiwon kiwon wei i kaam ka seiñ toh wow pynsñiawthooh donhi ya ki paidbah.
Katkam wa man kattæ, kiwa boon hi kiwa chong yaw da dep yoh tika COVID-19 ki. Hadooh ynne ka sngi kiwa da dep yoh tika ha ki yaw ki haat da em ki kamwa 60%, wei ha kini ki sngi wa daw wan ngait skem ka seiñ wa kiwa boon kiwa chongdai ha yaw daw e tika ki neibhah kiwa boon hi kwah ki wow yoh biang wow wai noh ya ki yaw ki haat kamwa jooh wai.
Heiyatoh wa ini, ka seiñ da e khublei ko ya kiwa chong dai ha ki yaw ki haat wa da chimkhia ki wow lai chim tika.
Ka RJTA da kyrpaad ko ya ka sorkar wa ya ki bor wa toh wow pait ya ki yaw ki haat wow sñiawbha ki wow rap pynyinsur ya i rukom pynlai ya ki yaw ki haat neibhah da boon kiwa dep yoh yei tika. Lada ka sorkar ym pu sñiawbiang ko wow wai yaw waroh leh, da toh wow elaad noh wow wai da ki Odd/Even khnang yow lait ware ko u ktah ya kiwa chongdai kiwa im-ja na i chongdai ha yaw.
Ka kyrwoh na u Rapmiki Pohti, Publicity Secretary, Ri-loom Jaintia Traders Association.
