I mih yong ki khubor wa em ki ICDS Centre kiwa da yoh pdiang da u khoo Plastic wa da u khoo wa da sih iwa pynlynngoh ya kiwa boon, tangwa neiliang ka chnat Social Welfare da pynche ko wa u khoo wa da saam ym toh u khoo Plastic, tangwa toh u khoo wa da da chna kyrpang neibynta yow tei yei dooh i pran u bru.
Hawa klam ynne ka sngi, u Montri ka chnat Social Welfare, u Kyrmen Shylla da ong u wa katkam i phah da ka sorkar pyrdi, ha man ka 100 kilo u khoo da hap wow khleh lang kamwa chi kilo u khoo Vitamin næ uwa em ya ki dawai wow tei ya i doh i pran kitu kiwa baam wa e cha ki khynnah yow yoh ki yei chait i khlan.
Tangwa da ong won u wa lada em sakhiat kiwa yoo ya utæ u khoo Plastic lane u khoo wa sih, ki paidbah ye ki u ujor syndon cha ka chnat khnang yow ye wow leh ya iwa emkaam.
U Kyrmen da ong chooh chooh u wa ym em e da u khoo Plastic neibhah katkam wa phah ka sorkar pyrdi, em u khoo (Vitamin) hadien wa da dep tylliat wei da booh 1% ha man la kawi kawi ka song.
Katkam i ong yong oo, ya utai u khoo hadien wa da dep tylliat, da khleh won wa ki kynja dawai næ Vitamin neibynta wow tei ye doh i pran ki bru. Chooh chooh da ong u leh wa hanla ya utai u khoo Vitamin ye u wow phær kajiak na i dur yong u khoo wa boon, tangwa toh uwa da booh khnang.
