Ka lehniam Behdieñkhlam ka Raij Jowai kawa da sdang ynnin ka Pynsiñ 8 tarik, ki khon ka Niamtre da pyndep ki ya ki sarin ka niam ha jar jiar ki yung ki sem wei ki khon ka Chiliangraij (Khon Raij) da pyndep ki yei rong i rah ya ka Symbood Khnong na khloo na kjam deiwa bood ya ki kyndon yada na ka khlam COVID-19 wei da chah wow chimbynta du 40 ngut ki khon chynrang kiwa da chim ya i tika.
Ynne i step ka Mulong 9 tarik da sakhi wa ki chakri Niam ka Raij nadooh u Dolloi, Pator, Langdoh, Sangot, wasan waheh wa ki kñi na ki kur waphær waphær da hiar ki cha Syiem Aitnar neibynta wow pyndep ya ka Kñia Aitnar kam ka dak wow e ngooh e dem wei wow pynkyntang yei man yong ka nadooh kani ka sngi heiwa ka adong niam da ong ko wa nadooh kani ka kynti ymhoi de u em kiwon kiwon kiwa tamkti tamkjat chei doh i pran yong ka Syiem Aitnar kat hadooh wow poi ka sngi Muchai wow yoohkjat nyngkong hei doh i pran yong ka da ki chakri niam.
Ya ka Kñia Aitnar da pynlut pynsep da u Dolloi ka Elaka heiwa ya ka lehniam ha kani ka step da pyndep da u Sangot Paswet deilang wei synran u Sangot Pakyntein wow Sangot Pasubon.
Hadien kani ka kñia, da em ka yachemlang yong ki khon Kmai Raij (Panaliar, Dulong, Loompyrdi Iongpiah, Loomiongkjam wa Loomiongkjam) ha Myngkoi Pyrdi (Iongpiah) heiwa da em ka yalang wa tbian wei hadien ini da mih won na kani ka thaw wow lai thooh ya ki Dieñkhlam na i thaw wa da thyllem ya ki kam na Riatturiem wa najan Salini Colony.
Neiliang ki Kmai Raij da jied ki mar 40 ngut ki wow chimbynta wow lithooh ya ki Dieñkhlam heiwa waroh kiwa chimbynta toh kiwa dadep chim tika yada COVID-19 wei da bood leh ya ki kyndon wa da pynkhreh wow yada nei poor kani ka khlam kjut.
Hadien wa da sai ya ki Dieñkhlam na khloo cha sarok da pteiñ ya ki chwa wow pynpoi won ya ki cha Iawmusiang heiwa da booh ya ki myntu chi sngi hachwa wow lithooh won ya ki mynstep ka Musiang wow rah won cha jar jiar ki chnong ki dong yong ki Kmai Raij.
Manda poi lut ki Dieñkhlam ha Iawmusiang, ki Khon Raij (Chilliangraij) da wanrah ki ya ka Khnong Blai wei da pynchong ya ka chipor ha Poh Sawiar (hajan ka yung krehkaam u DC, WJH) wei da rah won ya ka cha Loom Sooiung (hajan Marian Hills HSS) heiwa daw pynchong pynthiah ya ka myntu ka sngi.
Hadien ini ki Kmai Raij da liwan ki chirup na kawi ka luti cha ki dong ki cnat yong ki.
Ynne ka sngi hanlada kiwa chimbynta da em ki 40 ngut na jar jiar ki chnong ki dong kiwa chimbynta, da pynchongkhia ki ya ka sngi da ka Phali ka Yuspong wei da pynphooh leh ya ka sngi deiwa sap leh ya ki sula kiwa man jar jiar ki rong katkam wa da jied ki Dorbar Chnong yong ki wei da chaad ka-it mynsien ki hei ood ka bom, ka bhuri, ka bikur wa ki chew-chew.
