Ki ar tylli ki seiñ na East Jaiñtia Hills District wa kynthup ya ka Jaiñtia Youth Federation, EJH wa ka Southern Border Youth Welfare Association, EJH da lai yachem ki ya u Deputy Commissioner, u E. Kharmalki ynne ka sngi hajrong wow pyrchah ya ka UGO Billing Software yong ka MePDCL, Khliehriat Divisional Distribution kawa da pynkrehkaam da ka M/S Satnam Global Infrastructure (North East) heiwa ya kani ka rukom kheiñ bai bordiñ (Bill) da wan leh ha ki kattu katni tylli ki chnong wa kynthup ya ka chnong Umsatai, Ladwahwapung, Pynurkba, Umlyngsha, Ladlakadong katkam ka yutip kawa yoh kini ki seiñ.
Kamtæ ki ar seiñ da ong ki wa hajrong kani ka rukom chna Bill kawa thymme kawa leh da kani ka Company Satnam Global heidur ka Software tæ daw ktah joor ko ya ki paidbah ha waroh ki liang neibhah ka bai bordiñ daw ku dor ko neipor cheipor na uwi bnai cha uwi u bnai katkam i dor wa da booh da katai ka Company.
Chooh chooh da beiñ joor ki ya ka sorkar (lyngba ka chnat MePDCL) kawa da sdang u leh ya kani ka UGO Billing Software na thaaiñ palatsor iwa pynyoo heini da em i thmu cha lyndet yong ka chnat MePDCL, Khliehriat heiwa ki paidbah ym toh kiwa tip chaphang kani ka kaam chna bai bordiñ thymme da katai ka Company.
Kini ki arseiñ da phylla ki leh yei rukom leh ka chnat MePDCL, Khliehriat heiwa du ka rukom pynsñiawthooh paidbah leh ym pu em dep tæ ka sorkar da lai luti ko chaphrang wow leh yei kaam khamtam kani toh ka rukom chna bai bordiñ (Bill) thymme lyngba ki kor Computer/Software kawa da pynartatien ya ki paidbah wot ya kiwa kitkaam chnong hapoh East Jaiñtia.
Neitæ ki arseiñ da kyntu ki ya kitu ki chnong kiwa da dep wan chna Bill da ka UGO Bill wow sñiawbha u sangeh chwa u lai su ya ka bai bordiñ katwa ympu bait i kaam.
Heijooh i por ki ar seiñ da dawa ki ya ka chnat MePDCL, Khliehriat wow sangeh noh u phah lai chna Bill cha ki chnong waphær waphær hapoh District.
Khaddooh kini ki ar seiñ da kyntu ya ki paidbah, ki seiñbhalang kamjooh ya kiwa kitkaam chnong waphær waphær hapoh yong ka District wow yamih chaphrang u pyrchah ya kani ka UGO Billing Software System heiwa kani daw ktah joor bha ya ki paidbah wa pynemkaam bordiñ khamtam cha ki thaaiñ palatsor.
Ha ini i yachem, neiliang u DC EJH da kular u wow yaklam wa ki bor wa hajrong heiyatoh wa ini i kaam iwa daw ktah ya ki paidbah wa pynemkaam bordiñ.
Heijooh i por ki ar seiñ da maham ki wa lada ym sangeh yei pynkrehkaam ya kani ka rukom kheiñ bai bordiñ wa thymme, neiliang yong ki daw pynman ki dei yakhih iwa joor.
