U Montri ka chnat Forest & Environment Minister, u James K. Sangma da lai yachem u wa ki waheh chnong ki 18 ki chnong ha Mawlyndep, kam chibynta wow sdang ya ka thong wow sñiawthooh ya ki kaam wa yatoh wa ka rymaw iwa da jia neidaw wa da kylla ka suiñbneiñ (Climate Change), wei kammon wow leh yow chem ki laad ki luti wow pynbha pynmiat biang dei stat ki warim wajah wei dei chemphang ka chnong.
Ha ini i yachemlang da wan wow embynta lang da ki waheh chnong ka Mawlyndep, Umraleng, Mawlang, Umnongkrem, Sain, Urbania, Mawtnen, Nongtrawsoh, Umsohpieng, Wahskuin, Patharan, Umphung, Wahpipa Bangla, Lawhuleng, Mawkorblang, Nongtrawsiej, Niangdai wa Umtyrkhang.
“Ka Meghalaya man ko kam kawi na ki bynta wa pynkhooid ya ka la-ær wa tngit hapoh India. Kiwa boon ki bui (Report) ka United Nations da ong ko wa ki sngi wow wan daw ktah jooh bha ko ya ka rymaw neidaw i rukum kylla ka suiñbneiñ. Kamtæ ym toh de wow pynlut por,” da ong u James Sangma.
U James da ong u leh wa ka synchaar khadar u krehkaam ko du deiwa chimbynta ki paidbah, “Ka Meghalaya toh kawa mahajon ha ki stat yong ki warim kiwa da em boon kiwa myllien wa bha, kamtæ emkaam wow pynim biang ya ini. Wei ka thong leh man ko wow chim yei yarap na ki bru yow sñiawthooh kammon u ye ki u ya embynta lang yow yaleh pyrchah yei kylla ka suiñbneiñ namo ka Climate Change yow ye yarap wow yada ya ka rymaw.”
U James Sangma da tyrwa u wow sdang da ka Joint Forest Management Committee (JFMC) hapoh ka chnong Mawlyndep yow e bor ya ki bru wow man kam kiwa yada ya ki khloo ki kjam ka chnong deiwa ya krehlang ka chnong.
Kiwa boon na ki waheh chnong da ong ki wa duna ka yutip wei ym em khooid i rukom pynkrehkaam ya ki Scheme ka chnat Forest & Environment heiwa da em ki sahep wa da chim dei dor ya ki tre dieñ manda lai paan kiwa chong chnong yow thung dieñ.
Neiliang u James da pynsñiaw u yei sñiawkhia ya ini deiwa kular leh wow pynchitom ya ki bru sorkar wa leh ya ini i kaam.
Da pyntip u leh wa dang yaleh wow pynkylla pyrtuid ya ka chnat Department of Forest & Environment cha ka Department of Environment, Forest and Climate Change (DoEFCC).
Heiyatoh wa ka Rooftop Solar Scheme ka sorkar jylla, u James Sangma da paan yarap u na ki waheh chnong wow jied ya ki chnong wa ye u booh ya ki Solar Panel yow pynmih bordiñ deiwa suk.
Da khana u leh wa ka chnat bordiñ da pait ko yow pynkrehkaam ya ka PM Kisan Urja Suraksha Evam Utthaan Mahabhiyan (KUSUM) Scheme kawa daw yarap ya ki warep deiwa yoh laad ki wow dai ya ka bordiñ wa pynmih ki deiwa pynemkaam ya ki thaw yong ki wa sah chrah deiwa booh da ki Solar Panel.
