U Montri ka sorkar jylla uwa pait ya ka chnat Transport wa ka Urban Affairs, u Sniawbhalang Dhar da pyntip u wa ya ka Inter State Bus Terminal (ISBT) kawa em ha Mawiong dadep chna ya ka, heiwa da yooluti leh wow ye noh u wai paidbah noh ya ka da u Montri ki Kaam Pohyung ka ri India, u Amit Shah lada wan u ha ka 24 tarik uni u bnai cha nongbah Shillong. Da pyntip u wa katkam ka yutip wa da yoh hadooh katni, u Amit Shah ye u wow wan ha ka 24 tarik hadien wa da kyrriah tarik na ka 17 tarik lada ym pynkylla biang.
Hawa kylli, u Montri da pyntip u wa ya ka ISBT daw pynlai ya ka da ka chnat Transport wei hadien wa da wai paidbah daw ekti ya kani ka thaw pynyieñ kari cha ka Meghalaya Transport Corporation (MTC) ka wow pait kammon ki kari hap pynyieñ ki ha kani ka thaw.
U Sniawbhalang da ong u leh wa i thmu wow pynkrehkaam noh ya ka ISBT ha Mawïong toh neibynta wow pynkyllooid ya ka sor Shillong heiwa da pyntip u leh wa ya ki thaw wa jooh pynyieñ ya ki Bus wa wan na baar ka jylla ka chnat ympu u rai ko kammon wow pynemkaam ya ki.
Ka ISBT ha Mawiong toh kawa da e yarap poisa da ka North Eastern Council wa ka State Transport Department heiwa ya i kreh da pait da ka Public Works Department ha i lut wa kynjoh cha ka T. 48 klur.
Ya ini i kreh da mang nadooh u snem 2013 tangwa da sahteiñ noh wow wai ya ka da boonsien wei da booh thong wa ha kani ka thaw daw ye u pynyieñ hadooh 150-200 tylli ki bus kiwa wan na baar jylla.
