Haka 15 tarik Naiynñiaw, 2021 da pynman yaka (SAGE) SPECIAL AWARENESS GENERATION EFFORT ha Kyndongtuber kawa pynkhreh daka Medical Officer yong ka PHC Mynso ha Community Hall heipor 11 waje i step kam ka laad wow pynsñiawthooh paidbah yei emkaam u chim ya i dawai tika namo Vaccine i wow yada nei poor ka kjut khlam COVID-19.
Ha kani ka sngi da wan ap yeini i pynsñiawthooh da ki dkhot yong ki Village Organisation (VOs) waki SHG kiwa em hapoh kani ka chnong. Da wanlang leh kiwa yahkhmat na ki Seiñ Kynthai, kiwa sikai skur, ki waheh na ki Balang ka chnong, ka Seiñ Raij chnong, ki dkhot COVID Management, kiwa kitkam dong wa kiwi kiwi kiwa chong chnong.
U J. Treilang Suchiang, MDC da man u kam u kongsan. Da emlang leh ka Dr. R. Inboun, MO PHC Mynso, u L. Sohlang, ASWCO kam u Nodal Officer, u F. Khonglah, CC NRLM Laskein Block, ka R. Rymbai, PHN Mynso PHC, u Rev. W.P Lytan, Pastor i/c Kyndongtuber, u Lassiius Dkhar Head Catalyst Mooksiang Parish wa kiwi ki wakreh haka Health Department.
Kiwa klam waroh da kyrchaan ki yei emkaam ini i e tika kam ka laad wow yada ya kiwa chong chnong na ka khlam COVID-19.
Neiliang ka Medical Officer Mynso PHC da pyntip ko wa i wan chah e tika ha kani ka chnong man i iwa dang duna bha hadooh kattæ kattæ. Da ong ko leh wa kani ka tika toh kawa emkaam bha ha ini i por.
Neiliang u MDC hawa e yei klam yong oo, da kyntu joor u ya kiwa chong chnong waroh kiwa da dap 18 snem chaneiñ wow mih chakhmat wym toh dei chah pynbor, yow chim ini i dawai kawa man ka laad yada samen samen kamjooh leh ya ka chnong ka thaw waroh kawi. Da ong u wym hoi u ngait biej ya ki khubor pyntieñ haki Social Media namo i batai stad daki wym tip yeiwa man sakhiat. Da ong u leh wa ki khubor thok namo ki Video kiwa pynbiej yaki bru haki YouTube ki Mobile Phone toh ka laad kamai poisa donhi yong kitu kiwa chim kabu yei biej ki paidbah. Da khut sñiawbha u yaki paidbah waroh wow sdang noh ki dei mon sñiawbha wow lai cha ki thaw e tika nadooh ka sngi wa bood kamwa oo leh da dep chim u yei tika kamjooh leh kiwa yah khmat yong ka chnong.
Chwa wow pynkut yaka yalang da yoh yei kylli wei jubab pynche hapyrdi ki paidbah wa ki wakreh ka Health Department.
Hawa pynman ya kani ka yalang da bood ya ki kyndon ka Social Distancing kamjooh leh i deiñ yaki Mask.
Kani toh ka wyrta wa phah yutip na u Waheh Chnong Kyndongtuber u S.E. Siangshai.
