T. 15,000 ka bai pynthymme NOC ka Star Cement wa ka JHADC

Ynne ka sngi, ka 22 tarik da pynman ya ka Dorbar L’yur yong ka JHADC heiwa da sdang ko da ka kylli wa i jubab namo ka Question and Replies heiwa u MDC ka Jowai Central, u Andrew Shullai da kylli u hajrong lada ka Council da e NOC ko ya ka Star Cement wow tih moo ko na Brichyrnot, East Jaiñtia Hills.

Hajrong ini neiliang u CEM ka JHADC, u Thombor Shiwat da ong u wa kani ka karkhana da yoh ko ya ka NOC wow tih moochuni ha Brichyrnot nadooh u Naitung 2011 ya kawa da pynthymme (Renew) man u snem ha i dor wa T. 15,000.

U Andrew da kylli chooh chooh u hajrong ki yalang hapyrdi ka JHADC wa ka Jowai Municipal Board heiyatoh wa i thaw wow noh jhep ka Board, yeiwa u Evening Teron da jubab u wa da em ka Joint Inspection Committee wei ymslem de daw yoh noh ya ka bui (Report) hajrong kani ka phang. 

U Andrew da kylli u leh wa neiyi i daw wa da pynsangeh ya i noh jhep ha Mynkajai heiwa ya ka soskular hapyrdi ka Council wa ka JMB da soi ya ka ha ka 1 Naisaphra 2017 neibynta 20 snem wow e ya i thaw ha Mynkajai wow noh jhep ka JMB wei hajrong ini neiliang u Thombor da yieñ u wow jubab wa ya ka rai wow pyndam wow noh jhep ha ini i thaw da leh da ka sorkar jylla. 

Related posts

Hiar lai pait u Wailadmiki ya ki sarok wa da pynbna wow chna noh hapoh ka Jowai Constituency

May 4, 2025

Phah u Himanta wow tyngkheiñ yei kjat kiwa yaroh ya ka Pakistan

May 2, 2025

Chooh chooh hajrong kani ka phang u Andrew da sñiawkhia u neibhah wa ya i thaw ka Council da kyrriah nawi chawi wow noh jhep heithaw wow ye u thung da ki dieñ wa kiwi kiwi deiwa ban leh ya ka Council wow booddien ko wow pynkrehkaam ya kani ka soskular. 

Ha iwi tawon i kylli wa da wanrah da u MDC na War Central, u Holando Lamin wa lada ka sorkar jylla da pynlait ko ya ka Untied Fund na ka 15th Finance Commission, u Phasmon Dkhar da jubab u wa da yoh ya ka poisa kawa man T. 6,86,300. 

Hajrong ini da ban u Andrew deiwa ong wa ka sorkar ye ko wow ksoh du 10 sngi ya ka poisa wei toh u pynlait noh ya ka cha ka Council wei da kylli u wa lada em kawon kawon ka sut wa yoh ka Council na ini i ksoh slem ka sorkar ya ka poisa. 

Heiyatoh wa ini iwa kylli u Andrew, u Phasmon da ong u wa ka Council daw booddien ko ya ini. 

Ha kani ka dorbar ynne ka sngi da kynmoo warom leh ya u (T) Obil Kyndait uwa da jooh man kam u MDC ka Council 6 sien wei uwa da man leh kam u CEM wa Chairman yong ka Council.