Ka Environment Co-ordination Committee (ECC) yong ki khon ka Elaka Sutnga da kylli ko cheiwon wiar ka aiñ wa toh u yada ya ka rymaw? Weileh ka aiñ kreh ko du ya kiwa khian mo neibhah wa katkam ka hukum wa pynmih da u District Commissioner ka East Jaiñtia Hills ha ki 16 tarik uni u bnai da phah ya ki tre ki karkhana thang mooyong namo ki karkhana Coke kiwa krehkaam pyrchah aiñ khlem biang ki kot ki sla wow khang khyrdep noh ki tangwa kini ki karkhana da pteiñ ki wow krehkaam khlem mano ya ka hukum.
Da kylli leh kiyi wa toh u pait ya kini ki karkhana? deiwa ong wa ka Meghalaya State Pollution Control Board (MSPCB) hawa yaklam wa ki dkhot ka ECC, da ong ko wa ym em bor ko wow khang ya ki hanla kubur ko wa kini ki karkhana kreh ki pyrchah ya ka aiñ wei hawa yachem won wa u DC ka East Jaiñtia Hills District boonsien dap dei sñiawsih wa u DC leh da ong u wa ym embor u wow khang ya ki.
Ka ECC da dap ko dei mynsien wa sñiawkhia wa i wyrai ya ki khon ka Elaka Sutnga kiwa riñ mynsien da ka la’ær wa manbih neibhah wa kini ki karkhana dang krehkaam bait ki wei da thang bait ya u mooyong wei da khlai ki ya ki la’ær wa sma wa kiwa man-bih iwa daw ktah ya i chait i khiah ki bru.
Da ong wa kiwa chong chnong ka Elaka da chem ki wa ki tre karkhana da wan pynhiar chooh chooh ki ya ki tiar ki tar neibynta wow pynkreh ya kini ki karkhana wei ini da pynsñiawsih i wa ka aiñ ym krehkaam ko hapoh ka jylla khamtam hapoh ka Elaka.
Ka ECC da e yoh jubab ko leh lyngba ki RTI wa ki aiñ waphær waphær hajrong i man pyrchah aiñ ki karkhana wei hajrong ini da e dorkhat ko leh cha u montri rangbah, u montri ka chnat Environment and Forest, DC ka East Jaiñtia Hills, Chairman ka MSPCB, Chairman ka Meghalaya Assembly Committee on Environment, u khlieh ka liang pyrchah, SP ka East Jaiñtia Hills, tangwa kini ki karkhana dang kreh ki kamwa jooh hi.
Heijooh i por da ong wa kam kiwa chong chnong hapoh ka Elaka, da yoo yei chah pynjæd ka rymaw ha ki tre karkhana heiwa ym em de kiwa burom ya i man i long liang wannang ka Elaka khamtam wa i tdem wa khlai ki karkhana ktah i nyngkong ya ki khonboo, ki khynnah, ki bru wa da em chitom chwa wa kiwi kiwi.
Da ong ko leh wa i tdem wa mih da pynkylla dur i ya ki mar rep wa ki yung ki sem, wei hadooh katwon u ktah i ya i doh i pran ki bru.
Khaddooh hajrong ini waroh da kylli cheiwon u yut ki paidbah ka Elaka wei kammon ka mynried yong ki u man ko?
Kani toh katkam ka Wyrta na u Chairman wa na u Convener yong ka Committee.
Puræ leh: Phah khang u DC ya ki Coke Factory wym biang ki kot ki sla ha East Jaiñtia Hills
