U MLA ka BJP na South Shillong, u Sanbor Shullai ynne i janmiet da baam smai u kam u Montri wa thymme ka sorkar MDA ha ka yalang wa pynman ha Raj Bhavan Shillong.
Ya u Sanbor da pynsmai da u Lat ka jylla u Satya Pal Malik.
U Sanbor da chimkti u kam u Montri ha ka sorkar deiwa kylliang ya u MLA ka BJP na Pynthorumkhrah uwa da ksoh waroh chi kattu kam u Montri ka chnat i chait i khiah ha ka jylla.
Ini i pynkylla ya ka chuki Montri ya ki MLA ka BJP da man ko du hadien chi sngi wa wan u Union Home Minister ka sorkar India. Hadooh kattæ ym pu tip wa lada u Sanbor u yoh u ya kiwon ki chnat wow pait næ u chimkti u ya kiwa pait da u AL Hek uwa ksoh ya ka Health, Arts & Culture wa kiwi.
U Sanbor Shullai uwa man uwa mihkhmat ka 19 South Shillong Constituency, da jop u la 3 sien kam u MLA khlem rem, da jooh ksoh u leh la arsien kam u Deputy Speaker hapoh ka Yung Dorbar Chna Aiñ, wei da man u leh 5 sien kam u MDC ka Laban.
Hachwa wow chimkti kam u Montri hapoh ka sorkar MDA, da jooh ksoh u leh kam u Deputy Chief Whip yong ka sorkar wei kamjooh kam u Chairman ka Meghalaya Tourism Development Corporation.
Neiliang u Montri Rangbah ka jylla, u Conrad Sangma da e khublei u ya u Sanbor wei da kitbot kitrwiang u ya oo.
