Ki Youth Congress ki ynru jylla ka thaaiñ mihsngi wa kynthup ya ka Arunachal Pradesh, Mizoram, Nagaland, Manipur, Tripura wa Meghalaya da thoh ki cha u montri rangbahdooh ka ri, u Narendra Modi heiyatoh wa i awri kajia pood hapyrdi ki pulit ka Assam wa Mizoram deiwa kdaw leh ya i kajia pood wa kiwi ki jylla ka thaaiñ wa ka Assam iwa da sahteiñ da ki phaw snem.
Heiyatoh wa ini, neiliang kini ki ynru tylli ki Youth Congress da kyntu ki ya ka yung krehkaam u montri rangbahdooh ka ri wa ka Ministry of Home Affairs (MHA) wow pynbait noh ya ini chisiendon.
Da ong ko wa ka thaaiñ mihsngi em ko ya ki jaitbru wa ha rukom kiwa mahajon bha i rukom im yong ki iwa emkaam wow yada kamtæ emkaam noh wow pynbait ya u pood khnang wow wanrah biang ya i chongsuk wei wow lait ki bru wa choon ri u chim kabu ki ya ini.
Chooh chooh da kyntu wow sylli bniah biang ya ka North Eastern Regions (Reorganisation) Act, 1971 deiwa embynta waroh kiwa chah ktah neibynta i bha i miat ka ri.
