Ka Khasi Students’ Union (KSU) Jowai Circle hapoh i yahkhmat u Ewanmi Phawa, Vice President deilang wa ki kattu katni ngut ki dkhot da hiar ki ha ka 3 tarik uni u bnai cha Ynñiawmer, West Jaiñtia hills District wow khynra ya ki chi kynhun ki baar jylla kiwa da seh dara wow sahmiet ha katai ka thaw.
Ha itai i lai khynra, ka KSU Jowai Circle da chem ko wa hadooh 14 ngut ki baar jylla kiwa wan da ki Bus wa ki wym biang ki kot ki sla, kamtæ ka seiñ da phah pynuiñ biang ko ya ki cha i jooh i thawa wa wan ki.
Katkam ka kyrwoh, neiliang u Vice President da beiñ joor u ya ki bor pynlai District neibhah wa wot ha kam kini ki por wa joor ka khlam COVID-19 hapoh ka District, tangwa dang chem wa ym em pynrkhiñ ya ki baar jylla tangwa iwa sñiawsih won wa ya ki tre chnong wa ki tre jylla ki hap ki wow bood pynrkhiñ ya ki kyndon COVID-19, katwa kiwa na baar won yoh ki wow leh katwa ngait wei ym em hi leh wa pait yei psiah i mih kiwa wan na baar ka jylla iwa da booh hei sier wa i maa ya ka chnong ka thaw wa ka District hi waroh kawi.
