Neiliang ka seiñ KSU Jalaphet Unit, Elaka Sutnga, da e ko yei kyrchaan wa pura ya ka Environmental Coordination Committee (ECC) Elaka Sutnga hajrong i dawa wow khangtala noh ya ki Coke Factory kiwa em hapoh ka Elaka Sutnga neidaw wa da mih ki la kam ki tit ha kani ka thaaiñ wei da chna leh ya ki hapoh ki thaw wa chong wa sah ki bru, iwa da ktah sakhiat yei chait i khiah yong ki bru kamjooh wa pyntngit hadooh kattæ kattæ ya ka la-ær wa khooid wa riñ mynsien wei da pynsih ko leh ya ka bei rymaw.
Ka seiñ da ong ko wa i chna ya kini ki karkhana leh da man cha wa palat neibhah wa da chna hadooh 5-6 tylli du ha kawi ka chnong hadooh wym ye de wow riñ mynsien khamtam ya ki pli ki khynnah ki khonboo kiwa dang tlot i doh i pran. Wei lada ym khang noh ya ki smat, daw booh ko hei maa yei mynsien bru khamtam ya kiwa im cha kani ka thaaiñ.
Ka seiñ da e ko leh yei yaroh ya u MLA ka Sutnga Saipung Constituency u Shitlang Pale uwa da smat wow ya emlang wei wow kyrchaan ya ini i dawa ka ECC Elaka Sutnga deiwa lai synrang lang u yaki paidbah ka Elaka Sutnga wow lai toor cha ka yung krehkaam u DC ka East Jaiñtia Hills wow dawa pyndam noh ya kini ki karkhana wa pyrchah ya ka aiñ.
Ka seiñ da pynsñiaw ko leh yei lyngngoh wa yoh laad kitai ki karkhana wow mih kam ki tit ha ki por lyiur hapoh ka Elaka. Heiwa ha kini ki por wa da dep, ka Assembly Committee da dep ko wow wan pait ya kini ki Coke Factory waroh, tangwa hadooh katni ym em leh iyi iyi hajrong kini ki karkhana, kopsar da chah pynsuki kiaw ha ki ha ki tre karkhana, da pynbaad ka seiñ.
Ka seiñ da kylli ko leh ya ka sorkar jylla wa kammon kini ki karkhana da yoh laitlooid ki wow mih la kam ki tit du hapoh kattu katni por. Ka seiñ leh daw booddien ko wow dawa na ka sorkar jylla wow pyndam noh ya kini ki Coke Factory wa pyrchah ya ka aiñ hapoh ka Elaka kamjooh na kani ka District yong i, pynkut ka kyrwoh na u Emmon Chyrmang President KSU Jalaphet Unit.
