I awri awra heiyatoh wa i noh-jhep ha Mynjakai ympu yoodur wow kut i neibhah ynne ka sngi ki paidbah na ki 6 chnong kiwa kynthup ya ka Mupyut, Pynthorlangtein, Umsalang, Madatyrpait, Moosakhia wa Skhenpyrsit chirup wa ka KSU da mih yonglang ki wow pyrchah yei thmu wow pteiñ u noh-jhep ha Mynkjai.
Ki paidbah da rah ki chirup wa ki ya ki kot rben wa da thoh ya ki kyntien wow pyrchah ya ini i wan noh-jhep da ka Jowai Municipal Board ha ini i thaw, da thoh leh ya ki kyntien wow beiñ ya ka sorkar wa kiwi kiwi.
Ini i yakhih yong ki paidbah ynne da man i hadien wa pynmih u SDO ka Amlarem Civil Sub-Division, u Abhilash Baranwal ynnin ka sngi ya ka hukum wow pynkrehkaam ya ka kyndon 144 CrPC wow chah ya ka Jowai Municipal Board wow noh jhep biang ko chipor ha ini i thaw.
Kam wow kdaw heini u Deputy Commissioner, West Jaiñtia Hills District da khut yalang u ha ka 2 tarik uni u bnai wa kiwa chong chnong kani ka thaw da rai wow pteiñ u pynemkaam wow noh-jhep heini da ka JMB hadooh wa da jied da iwi tawon i thaw iwa ymtoh u chimpor palat 6 bnai. Tangwa ha ka yalang wa bood won kawa pynman ha ka 6 tarik uni u bnai, kini ki Dorbar Chnong won da rai ki wow pyrchah yei pynemkaam ya ini i thaw noh-jhep hanla du chipor donhi leh.
Ka hukum wa pynkrehkaam ya ka 144 CrPC toh da kdaw ko leh wa u Chief Executive Officer, Jowai Municipal Board toh u pyntikna u wa u bood ya ki kyndon hawa noh ya i jhep ha ini i thaw katkam ka Solid Waste Management Rules 2016 wa pynmih da ka Ministry of Environment, Forest and Climate Change hawa noh ya i jhep ha Mynkjai Landfill.
