Da u: Refil Sari, Mukhla Nongrim
Ha kani ka juk wa wa katni,
I chongsuk chongsaiñ emkaam i ki.
Ha sor namo ha nongkyndong,
I chongsuk chongsaiñ to ya kyntu kynrong.
Wym hoi u ya atnood u ya bichni,
Kynmoo mo lok yeini uwi pa ka wi.
Ya i waroh heini da booh kyrpang da u Blai,
Yow ya im suk i chynrang wa kynthai.
Yachaan kylliang yarap kylliang,
Yow ku i manbru long bru i liang wanang.
I ya boh ya sien kynjat ki cha jngai,
Yow ya im suk im saiñ i heini ha pyrthai.
I lait i let i tam i duna,
To maap kylliang ki dei mynsien maya.
Wym hoi u ya beiñ u ya kynnoh,
Chisur chidur yeiwa bha to ri to ksoh.
Dei mon dei khe i yong me Kynrad,
Chare kune ya i ha man ki luti ki laad.
Ham ieh u man i kiwa sah chariah chadong,
Deiwa miat wa bha ya i Kynrad kyntu kynrong.
