Ka Khynroo Khyllood Committee (KKC) yong ka Seiñraij Jowai da pynemwarom ko ya ka sngi laitlooid ka ri deiwa kynmoo ya i burom i naam yong u khlawait ka Ri Jaiñtia, u Woh Kiang Nangbah uwa da yaleh pyrchah ya ki dohlieh neibynta wow pynskem ya ka niam ka rukom kawa em i tre i thied ha ka Ri Jaiñtia.
Chibynta i pynemwarom, toh i emktilang wa i dap 75 snem i yoh laitlooid ka Ri India na i synchaar yong ki pharæng.
Ha kani ka sngi da em ka yalang wa da pynlai da u Vice Chairman KKC, u Rangbahmi Kynjiñ, i klam na u Arwotki Sumer, General Secretary Seiñraij Jowai, i ngooh Blai na u Ebormi Sungoh, u O.R. Shallam, President Seiñraij, Jowai.
Da booh leh ya u syntu hakhmat u mot sahnaam U Woh Kiang Nangbah uwa em ha Loom Mooliksoo, i thaw wa pyndep ya ka niam yap ha i thaw wa da booh ya ka chyieñ ka chrooh yong uni u khlawait.
Ka bynta kawa ar ka yalang da pynman ha u mot sahnaam uwa em ha tre u Loom Mooliksoo, neiliang u Puramon Kynjing, Dolloi Elaka Jowai da booh u ya u syntu kam ka dak wow burom wow sñiawngooh yeiwa U Woh Kiang Nangbah da e kti u ya i mynsien yong oo neibynta wow yada ya ka niam ka rukom, ka dustur ka riti yong ka jaitbru.
Hadien i booh syntu da rwai ya i sur National Anthem da ki dkhot ka KKC wa ki waheh wasian wa emlang ha kani ka sngi.
