Ka sorkar jylla da rai ko wow pyndam kreh chipor ya ki pulit kiwa chah thombor ynnin ka sngi ha Mawlai Mawkynroh kiwa da ieh noh ya ki tiar siat deiwa yut na itai i thaw.
Hawa klam ynne ka sngi u Montri Rangbah ka jylla, u Conrad K Sangma da ong u wa da em soo ngut ki pulit kiwa chah thombor ynnin ka sngi, heiwa 3 ngut na kini da ieh noh ki ya ki tiar yasiat wei da yut katwa uwi da rah lang u ya ki tiar wa em u.
Ynnin ka sngi chi kynhun ki bru ki wym ye wow tipmit da thombor ki ya kawi ka kari pulit ha Mawlai Mawkynroh Outpost, wei ha itai i thombor da ki bru kiwa da tymmoh yei dur khmat, da knieh ki ya ka kari Scorpio wa da pynemkaam da ki pulit deilang wa ki suloi 3 tylli, wei hadien ini ya kani ka kari da lai wow thang ha Jaiaw Chappel Road.
U Conrad da ong u wa hajrong itai i jia, neiliang ka sorkar da thung ko ya ka kynhun takit, heiwa da pyntikna leh wa ya ki 3 ngut ki pulit kiwa da ieh ya ki tiar siat ka sorkar da pyndam kreh chipor. Ha i jooh i por, u Montri Rangbah da kyntu u ya ki bru kiwa rah ya ki tiar siat yong ki pulit wa toh u pynuiñ noh smat.
U Montri Rangbah da klam che u leh wa ka aiñ ym maap ko ya ki bru kiwa emkti ha itai i jia lada toh ki pulit wa leh stiñ ya i kaam næ ki damok kiwa lai thombor, wei da kyntu u leh ya ki paidbah wa chong chnong wow pynneh ya i suk i saaiñ.
