Ka Khasi Jaintia Christian Leaders Forum (KJCLF) da pynsñiaw ko yei sñiawkhia wa joor hajrong i long i man ha ka ri yong i ha kini ki kajiak sngi deiwa ong wa i sñiawsih wa khroo da tymmoh ko ya i waroh neidaw wa chah siat yap noh u Cherishsterfield Thangkhiew ha yung u ha ka miet synyaw chwa wow mih sngi ka 13 tarik u Naisaphra 2021.
Ka Forum da ong ko wa ka aiñ da thombor ko ha rympei ha chnong, wei ini da pynkhyrngiat wei da pynkthang ko ya waroh. Ini da pynman leh wa ki bru yong ka aiñ, wa kiwa ksoh ya i bor wow dooh noh ya i chaniah kawa sngur yong kiwa chong chnong waroh.
Ka KJCLF da phah ko leh yei sñiawlem cha kiwa hayung hasem u Cherishsterfield Thangkhiew wa cha waroh kiwa maad ya i lyngam dei wym em de uni u Rangbah. Neitæ ka Forum da kyntu ko ya ka sorkar wa ki bor yong ka aiñ wow pyndep smat ya kiyi kiyi wa emkaam wow leh ha i rukom wa hok wa iwa che neibynta ka chongsuk chongchngaaiñ ha ka ri.
Khaddooh, ka Forum ka khut ko ya kiwa yahkhmat ki Balang wa ki kynhun waphær waphær, kiwa yahkhmat chnong, ki mabei, ki khon khynroo wa ya waroh kiwa chong chnong, wa kynthup ya ka sorkar leh wow ya krehlang neibynta ka chongsuk chongchngaaiñ ha ka jylla.
Najrong i chah ktah dukhi yong kiwa boon ha ka khlam COVID-19, katni ym ye de wow chah ban chooh sa ha kiwi won kiwa ban khia kiwa ktah ya i im wa man-ka-sngi yong i. Ka Forum ka duwai ko wa u Blai wa booh wa thaw u kyrkhu u ya waroh.
