Kular ka Taliban wow burom yei hok ki kynthai wei wow maap ya kiwa yaleh pyrchah ya ki

Ka Taliban da kular ko wow burom yei hok ki kynthai, u maap ya kitu kiwa yaleh pyrchah ya ki wei wym e laad wow pynman ya ka Afghanistan kam ka thaw rieh chngaaiñ ki Terrorist wei yeini da ong hakhmat kiwa thoh khubor ynnin ka sngi kam chibynta wow pynyoo ya ka pyrthai wym toh u khuslai u tieñ ki.

Hadien wa mih ki chipai ka USA na Afghanistan, ka Taliban wut wut da jop biang ko yo kiwa boon ki bynta ka ri hadooh wa poi ha Kabul yow chimkti noh ya ka ri hadien wa u President ka ri u Ashraf Ghani leh da yut u cha ka ri Tajikistan ha ka 15 tarik.

Ha kani ka kynti ka Taliban da pyrchang ko wow pynyoo da iwi i dur kam kawa pyrkhat ya kiwi ym toh kawa da pynkhor ware kam nachwa heiwa da pykrehkaam ki da ki aiñ Islam wow synchaar kamwa da leh ki ha ki snem 1990, tangwa kiwa boon dang artatien ki ya ini wei da pyrchang ki wow yut napoh ka ri iwa da wanrah leh ya i ya chlong ki paidbah cha ka Airport yow yut da kiwon kiwon ki lieñsuiñ wa bien u kit ki.

Ka juk wa nachwa kiwa kynmoo ya i synchaar ka Taliban heiwa ya ki kynthai ym chah ya ki wow mih ki na yung, ym chah ya ki bru wow pait TV, u ap sur ki wei kiwa leh pyrchah da pynyap ya ki hakhmat ki paidbah. Hadien ka 9/11 da hiar thma ya ka Afghanistan da ki chipai wa yahkhmat da ka USA hadien wa chem wa ka Al-Qaida da krehkaam ko napoh Afghanistan hapoh i yada ka Taliban yow leh ya ki kaam pynmynsoo hapoh ka USA.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

U Zabihullah Mujahid uwa man kam uwa e ktien ka Taliban hawa yaklam wa kiwa thoh khubor ynnin ha sngi hadien wa da slem bha, da kular u wow burom yei hok ki kynthai katkam ki aiñ Islam deiwa khlem batai bniah. Da pynchlur u leh ya ki kynthai wow lai kreh biang ki, ya ki khynnah kynthai wow lai skur ki, heiwa da em leh ka e khubor kawa man ka kynthai kawa da yaklam wa ki Taliban ha ka 16 tarik hapoh ka TV Studio.

U Mujahid da ong u leh wa ym e laad yow pynemkaam ya ka Taliban yow leh ya ki kaam damok ha kiwi ki ri kam nachwa deiwa ong wa ha i yaklam yasuk ha u 2020 hapyrdi ka Taliban wa ka  sorkar u Donald Trump ini man i kam iwi na ki kyndon yow mih noh ki chipai ka USA na Afghanistan.

Da khana u leh wa ka Taliban u maap ko ya waroh kitu kiwa kreh wa ka USA yow yaleh pyrchah ya ka Taliban wei ym em wow lai cha yung yong ki wow kylli ileh krehlang ki wa ka USA.