Uwa e ktien ka National People’s Party (NPP) u Marcuise N Marak, MLA ha ka kyrwoh wa da phah da ong u wa iwa ong uwa e ktien ka Congress u Randeep Surjewala, uwa da pynemkaam ya ki kyntien ‘Terrorist’ wa ‘Taliban’ hawa klam chaphang ki khynroo ka Meghalaya toh iwa sñiawsarom bha. Deiwa kdaw wa ini pynyoo ko wa ka Congress ym sñiawthooh ko wa kammon ktah ko hawa ong ya kam kini ki kyntien iwa da pynyoo leh wa da man ko kam ka Party kawa khlem yurim, deiwa klam da ki kyntien wa khlem biang ka yutip.
U Marcuise da ong u wa ha ini i por wa ka sorkar MDA wa yahkhmat da ka NPP da ya krehlang ko wa ki paidbah wow wanrah yei suk i saiñ, man ko iwa sñiawsih wow yoo wa ka Congress da lai thooh khajia ko deiwa e pyrtuid ya ki khynroo kam ki ‘Taliban’ iwa da pynsihdur ko ya ka jylla Meghalaya hakhmat ka ri waroh kawi. Wei ini pynyoo ko wa Congress ym em phær i sñiawthooh ko kam ki tre chnong wa kam ki baar chnong ya i long i man ha ka synchaar khadar hapoh Meghalaya.
Ka NPP da pdiang ko leh wa ini iwa jia ha kini ki kajiak sngi toh iwa sñiawsih wei da yooluti wa i chem ka Judicial Inquiry daw ye u pynchitom ya kitu kiwa leh pyrchah ya ki paidbah.
Ka NPP da pynkynmoo ko wa u Mukul waka Congress wa i long i man ha Meghalaya ha i por wa synchaar ka sorkar yong ki toh kiwa dap da ki kaam chah maham wa ki kaam pakhang chnong da ki seiñ kieñ suloi. Katni won da ye wow lai cha kiwon kiwon ki bynta ka Khasi, Jaiñtia wa Garo Hills khlem da emkaam wow booh ya ki pulit ha tymbood sarok. Tangwa katni hapoh ka sorkar MDA da em i suk i saiñ lait noh ki kattu katni kiwa jia wei da ye wow pynbait da i yaklam.
Ka NPP da kdaw ko leh yei rukom synchaar embor da ka sorkar wa yahkhmat da u Mukul iwa da wanrah ya iwa boon i eh heiyatoh wa ka aiñ kam iwa jia i siat yap ya u Full Moon Dhar ha ka 01-06-09 hadien wa yut u na Shillong Jail. I yap u SI PJ Marbaniang, u Officer-in-Charge ka Patharkhmah Outpost ha Ri-Bhoi District heiwa da chem yei metyap yong oo ha Quarter u ha Patharkhmah ha ka 24-01-15 chi sngi hadien wa ksoh u ya 32 tylli ki truck kit mooyong pyrchah ya ka aiñ heipor wa lai ki na Patharkhmah. Chwa ka 2018 Election, u kyrtong ka NCP u Jonathone Sangma da chah pynyap u ha ki seiñ kieñ suloi ha Garo Hills, tangwa ka sorkar Congress suki hi-eh ko neidaw wa u Jonathone ym toh uwa naka Party yong ki. Heiwa wot ya ka takit (Inquiry) leh ym em thung. Wei hachwa ini, u Jonathone da dep u wow ujor wa ka Deborah Marak chwa ka Election 2013 da pyrchang ko wow pynemkaam da ki dkhot ka GNLA yow maham ya kiwa thap Vote heiwa ka Marak da jop ko kam ka kyrtong Congress ha u 2013. Khaddooh da pynkynmoo ya ka Congress wa kammon leh hawa em i yakhih heiwa da chah siat yap 9 ngut kiwa dang lai puræ heipor sngi ha ki pulit hajan ka MBOSE ha Tura wa Williamnagar, heipor wa u Mukul Sangma man u kam u Home Minister ha u 2005.
Katni won ka Congress da pynemkaam ko ya i kyntien ‘Terrorist’ pyrchah ya ki bru ka Meghalaya. Wei ya u Surjewala, dei bor sñiawthooh yong oo kam uwa na baar u wym em bna wow tih bniah da ktah ko yei dur ka jylla. Wei da leh u ya ini du wow mih khubor khlem da pyrkhat yei chong yurim. Kamtæ da dawa wa u Surjewala deilang wa ka Congress wow paan maap ki na ki bru ka Meghalaya.
Puræ leh: Lakam ki Taliban uiñ ki bru ha Shillong dei tymmoh-khmat wei rah suloi: Congress
