Ka Chairperson ka Meghalaya State Commission for Protection of Childs Rights (MSCPCR) ka I.M. Syiem da beiñ joor ko yei chah salitbor ki 4 ngut ki khynnah khynthai ha kiwa boon ngut ki bru iwa da jia ha ka 8 tarik uni u bnai deiwa ong wa ini da man ko sa iwi i jai pyrchah ya ki khynnah ha kini ki por wa em ka khlam.
Ka MSCPCR da bieñ ko ya waroh ki kaam wa ktah yei long i rynyieñ ki khynnah chynrang wa kynthai deiwa ong leh wa ha kam kini ki por wa eh wa chem chitom, ki khynnah suk bha ki wow chah ktah ha kiwa boon ki liang nadooh i sñiawdiaw mynsien, i sy’er mynsien neidaw ka Lockdown iwa ye u ktah yei bor pyrkhat pyrdaiñ yong ki.
Kamtæ da khut ya waroh wow ya ksohktilang nadooh ki bei ki pa, kiwa sumaar sukhær, ki payu para, kiwa sika waka imlang sahlang waroh kawi wow man ki kiwa paitbniah yow yada ya ki khynnah yong i katwa ye i.
Ka Chairperson da duwai ko leh ya waroh ki khynnah kiwa da chah ktah na ini iwa jia kamjooh ya ki bei ki pa yong ki kiwa da hap wow kitlang ya ini wa jia wa sñiawsih.
