U Montri Rangbah ka jylla, u Conrad Sangma da pyntip u wa ynne ka sngi hadien wa da dep chong yalang ki Montri sorkar (Cabinet Meeting) da chim ya ki rai wow wai noh ya ki thaw puræ wa ki kaam wa yatoh wa ka uiñke suwari nadooh ka 1 tarik u Naikhynde 2021 hapoh ka jylla.
Heiyatoh wa ki thaw puræ, waroh ki College kiwa em ha ki thaw wa em ha sor wa cha palatsor u wai ki nadooh ka 1 tarik u Naikhynde 2021. Ki skur won kiwa em ha ki thaw sor kiwa nadooh Class I hadooh Class V u man ki du da ka Online, nadooh ka Class VI hadooh Class VIII toh deiwa lai hi-eh cha skur (School Visit), ki Class IX hadooh Class XII u man ki kiwa wai noh.
Ha ki thaw wa em cha palat sor, nadooh Class I hadooh Class V daw em du da ka School Visit, Class VI hadooh Class VIII toh kiwa wai kamjooh leh Class IX hadooh Class XII u man ki kiwa wai.
Heiyatoh wa ki kaam uiñke suwari da rai wow wai noh nadooh ka 1 tarik u Naikhynde. Kiwa uiñke suwari wa wan na baar jylla toh u man ki kiwa da dep yoh tika waroh arsien. Ya kitu won ki wym pu em dep yoh tika lane kiwa yoh dang su chisien hap ki wow pynyoo ya ka Negative RT-PCR/ TRUNAAT/ CBNAAT Test Result kiwa pdiang lada dep chah Test ki hapoh 72 kynta chwa wow psiah chapoh ka jylla ha ki Entry Point.
Kiwa wan uiñke suwari leh hap ki wow yoh ya ka e-Invite yow psiah cha Meghalaya lyngba u App ka Meghalaya Tourism Department wei hap ki leh wow booh namo wow Book chwa chi miet i thaw sah ha ki Hotel/Homestay/Guest House wei wow khana cheiwon de u lai ki. Kitu won kiwa sah ha ki yung ki bru, hap ki wow khana heiwon em i yung wa sah ki wa ki Phone Number yong ki tre yung.
Ya kiwa uiñke suwari kiwa napoh ka jylla hi, ym khang wow lai ki cha iwon iwon i thaw wa em hapoh Meghalaya lada man ki kiwa da yoh tika waroh arsien lane dang du chisien leh. Tangwa lada toh ki wym pu em yoh tika, daw hap ki wow pynyoo ya ka Negative RT-PCR/ TRUNAAT/ CBNAAT Test Result chwa wow psiah ha kiwon kiwon ki Hotel lane ki thaw uiñke suwari.
