Hadien wa mih i kynaad ha ki bynta khappood ha thaaiñ Umlaper, Ri-Bhoi wa ka West Karbi Anglong District, Assam ha kini ki sngi wa da dep. Ynne ka sngi, ki DC wa ki SP ki ar District da yachem ki wow yaklam hajrong ini i kaam.
Ka DC ka Ri-Bhoi ka RM Kurbah hawa yaklam wa ki laad pathai khubor da pyntip ko wa hadien wa yachem lang wa ka DC wa u SP, da chim ya ka rai wow pynneh ya ka Status Quo yow pyntikna wa ym jia de iwon iwon i awri awra.
Ka Umlaper toh kawa haap hapoh ka Block-II kawa man leh kam kawi na ki thaw wa ya kajia pood namo ka Disputed Area, kamtæ da rai wow e laad chwa ya ki sorkar jylla wow pynbait ya ini i kaam khamtam ha kini ki por wa da lai ka yaklam pynbait pood chakhmat.
Kam wow pynkynmoo wa ini wa dep da em uwi na kiwa chong chnong ka Umlaper da chah dat u ha ki pulit ka Assam iwa da pynman ya ki paidbah wow tympra ya ka Check Gate wa booh ka Assam ha katai ka thaw.
Ka DC ka Ri-Bhoi da kyntu ko ya kiwon kiwon ki seiñ lane ki bru wym toh u wan pynchongchit cha ki thaw khappood khlem da tip kiwon kiwon neibhah ini da pynmih i yei kynaad wei ha kani ka thaw da em le jait ki jaitbru wei lada wan da kawi na kini ki jaitbru daw pynchit ki ko ki bru wa sah cheini neibhah kitu kiwa wan ym tip ki iyi jia ya ki bru hadien wa liwan ki heiwa kini ki bru da chong sy’ier ki waroh, kamtæ da kyrpaad ko ya ki seiñ wow e laad ya ka sorkar wow yaklam yow pynbait ya u pood u ang.
Da ong ko leh wa ini i kaam ym toh iwa dang ynnin ynne wei iwa da em nadooh wa mih ka jylla, kamtæ daw chimpor i kamtæ toh u sangeh cha wow wan e sñiawlem hadooh wa ye ka sorkar wow pynbait ya i kaam yow ye ki 18 chnong wa em heini wow chongsuk chongsaaiñ.
Chooh chooh da ong ko wa ha kiwon kiwon ki chnong em ki i yong ki hi i eh wei kam kiwa chong chnong toh u e laad wow pynbait ki para ki ym toh wow wan tuklar da kiwa na baar, wei hoi hi wow e mynsien ya kiwa chong chnong tangwa ym toh deiwa wan cha kini ki thaw, heijooh i por wow burom yow im suk kini ki bru cheini para ki. Hajrong ini da pyntip ko wa daw pynbna noh da ka Section 144 yow khang yei pynman ya kiwon kiwon ki yalang.
Neiliang ka DC ka West Karbi Anglong leh da ong ko da yaklam ya ini i jooh wei daw khang leh ya ki bru neiliang yong ka wow wan cha ini i thaw.
