Ka Dorbar ka Yung Chna Aiñ ka jylla Meghalaya daw pynman ya ka nadooh ka 10 hadooh ka 17 tarik uni u bnai kawa tip leh kam ka Autumn Session heiwa da booh ya ka 10, 14 wa 17 tarik kiwa tip kam ki sngi neibynta ka Government Business namo ki kaam sorkar katwa ya ka 13,15,16 tarik neibynta ki Private Member Business heiwa daw em leh ar sngi ki sngi chuti.
Ha kini ki sngi wa pynman Dorbar daw em leh ki kynta wow booh ya ki phang kylli ha ki Montri wa pait ya ki chnat sorkar kiwa hap leh wow e yei jubab kawa tip leh kam ka ‘Question Hour’ kiwa ha kiwa boon ki por toh kiwa chongchit wei kiwa da mih khubor bha.
Heiyatoh wa ini, neiliang u Meghalaya Legislative Assembly Commissioner & Secretary u Dr. Andrew Simons da khana u ya i emkaam ka Question Hour wei kammon krehkaam ki.
Da ong u wa i por wa da booh yow wanrah yei kylli toh iwa emkaam heiwa kiwa em ha ka sorkar da hap ki wow pynyoo yei bahkhlieh ki hakhmat ka dorbar. Heiwa hapoh Meghalaya da sdang ya ka dorbar da ka kynta wow wanrah ya ki phang kylli namo ka Question Hour kawa nadooh 10:00 waje i step hadooh 11:00 waje i step lait noh ha ka sngi nyngkong ka dorbar.
Ha ka kynta wa booh ya ki phang kylli da emlang ki MLA yong ka liang synchaar kamjooh ka liang pyrchah heiwa ki sahep sorkar leh da emlang ki yow yarap ya ki Montri wow jubab ki ya ki Supplementary Question namo iwa da kylli booddien hadien wa dep yoh yei jubab.
Kamtæ hawa kylli da em ki ar jait, 1. Starred Question wa 2. Unstarred Question. Ki Starred Question toh kiwa da dep chon chwa deiwa emlang wa i jubab ki Montri wei da booh hakhmat ki dkhot ka dorbar wei ya kini ki jubab toh u puræ da ki Montri cha kiwa kylli wei hadien wa u Montri da e u yei jubab, uwa kylli ye u wow booddien deiwa kylli sa 5 tylli kiwa tip kam ki Supplementary Questions kiwa yatoh wa iwa da dep kylli chwa ki. Kiwi leh ki dkhot ka dorbar ye ki wow kylli ya ki Supplementary Question hajrong i jooh iwa da kylli chwa.
Ya kiwi de kiwa kwah wow kylli hajrong i jooh daw jied da u Speaker wei daw jied u ya u/ka wa chon hei khmat yong oo deiwa booh por u leh katwon u pynlut wow yaklam hajrong ini wa kiwi de ki phang kylli kiwa da booh.
Lada hawa kylli ya ki Supplementary Questions u Montri wa jubab ym em u ya ka yutip lane da kylli chaphang ki wym tip u, ye u wow paan da ka ‘Notice’ yow pynkhreh yei jubab.
Lada hawa jubab da u Montri man i iwa jrong, u Speaker ye u wow phah booh yei jubab hakhmat ka dorbar kiwa daw saam won cha ki dkhot ka dorbar.
Ha ki por wa da wanrah ya ki phang kylli, u Montri Rangbah, uwa yahkhmat ka liang pyrchah wa u Montri wa pait ya ka Parliamentary Affairs toh ki wow pait ya ki kyndon pynlai ya ka dorbar heipor wa em ka yatai.
Ki thup kylli kiwa tip kam ki Unstarred Questions leh toh kiwa da dep chon chwa deilang wa ki jubab wa e da ki Montri wei ya ki Unstarred Questions toh kiwa ye u wanrah hadien wa da pyndep ya ki Starred Question ka sngi. Ki jubab ya ki Unstarred Questions ha kiwa boon ki por toh kiwa jrong wei ya kini leh da saam cha ki dkhot ka dorbar.
Ki phang kylli waroh kiwa da wanrah nadooh kiwa yatoh wa i synchaar khadar, ki rukom krehkaam ka sorkar wa kiwi kiwi de toh kiwa da pait da sylli chwa da ka Assembly Secretariat wei da phah cha ki chnat sorkar yow pynkhreh ki yei jubab da ki Montri deiwa booh leh ya ka tarik wow wanrah ya ki hakhmat ka dorbar.
Lada toh won iwa da kylli dang em i hapoh i bichaar da ka yung bichaar, ya kini ym pdiang da ka Assembly Secretariat.
Ka kynta wa hap jubab ya iwa da kylli da man ko leh i por wa eh dooh ya ki Montri hawa pynman dorbar heiwa ka liang pyrchah daw pyrchang ko wow khyrwait lyngba ki Supplementary Questions wei ha kiwa boon ki por da chit bha ka yatai, kamtæ u Speaker ha kini por toh u pyn jai-jai u ya ka yung dorbar.
U Meghalaya Legislative Assembly Commissioner & Secretary u Dr. Andrew Simons da ong u wa hapoh ka jylla i rukom yatai da man ki kiwa emakor emburom wei ym jooh em i pynthut hadooh wow hap pyndam ya ka dorbar.
Kamtæ da yooluti u wa ha kani ka dorbar daw rap suk ki paidbah wow sñiawthooh manda yoo ki ya ka yatai kamjooh manda kylli wei kamjooh manda e jubab.
