U Chief Executive Member (CEM) ka Khasi Hills Autonomous District Council (KHADC), u Titosstarwell Chyne da ong u wa ka KHADC daw chimkhia ko heiyatoh wa i Tangjait, khamtam wow lait na i Tangjait arsien ya ka jooh ka jait.
Ynne ka sngi neiliang ka Hynniewtrep Youth Council (HYC) Sohiong Circle da lai ko wow ujor hakhmat u CEM yei chem wa da Tangjait arsien ya ka jait Kharshari.
Hadien katai ka ujor, neiliang u CEM da phah u wut wut ya ki sahep ka Council wa ym ye wow Tangjait arsien, wei da ong u leh wa daw khut ya kitu kiwa da Tangjait neibhah man ko iwa maa.
U Titos da ong u wa em ha kylleiñ ka ri Khasi kiwa Tangjait, tangwa ka KHADC ym tip ko, wei da yaroh u leh yei chimkhia yong ka HYC kawa da ye wow tip wa em kam kini ki rukom Tangjait, heiwa da kyntu leh ha i jooh i por ya ki kur kiwa em ha ka ri Khasi wa toh u thooh ya ki jait kur kiwa da dep Tangjait.
Da ong u wa ya ka kur Kharshari da Tangjait nyngkong da ka kur Rynjah katwa iwa ar da Tangjait na ka kur Shabong iwa ye wow wanrah yei eh ya ki khon, wei da ong u wa kam kini kiyi kiyi toh u pynkhyrngiat wei pynhusiar wa ym toh u em i jooh i jait næ Tangjait arsien.
U CEM da ong u wa khnang wa ki paidbah u yoh yutip wei ym wanrah iwon iwon i eh ya ki jait wa da dep tang nyngkong, ka Council daw booh noh ko ha ka Website khnang wa kitu kiwa mut wow Tangjait yow tip ki yow lait na i Tangjait arsien.
Da ong chooh chooh u wa i Tangjait man bait ko du ya ki khon, wei lada u chynrang Khasi yoh kurim u da ka wym toh ka Khasi, ka bei ki khon næ ka kurim ym ye ko wow Tangjait neibhah man ko iwa maa wei ka Council ym pdiang ko.
Hawa yaklam wa u President ka HYC Sohiong, u Purningstar Shabong da ong u wa ka seiñ da chem ko ya ini i Tangjait arsien ya i jooh i jait hadien wa da leh da ka RTI, wei ya kani ka jait ka Council da e ko leh yei tipmit. Da ong u wa neiliang ka seiñ da wanrah ko ya kani ka phang neibhah wa da wanrah ko yei tkoh ya i rukom kheiñ kur kheiñ kha. Da pyntip u leh wa neiliang u CEM da kular u wow khut ya katai ka kur yow pynbait noh smat.
Da pyntip chooh chooh u wa da yaklam leh heiyatoh waka kynthai ka wym toh ka Khasi wym toh u Tangjait ya ka hawa yapoi kha wa u chynrang Khasi neibhah da tyngkheiñ ya ki aiñ yong ka KHADC, wei ha i jooh i por da man ko pyrchah ya ka rukom Tangjait wa ye u wanrah yei maa wei daw boon ki ki huri hura.
