U Director of Health Services (DHS), u Dr. Aman Warr da ong u wa ki paidbah toh u man ki kiwa syndong wa kiwa husiar ya idæ na u khñiang COVID-19 hadien wa ka sorkar da pynlait ko ya waroh ki jaitkaam ha ka jylla nei chah pynrkhiñ.
Da ong u wa hadien wa da em i kdoh i khoom nadooh u snem wa da dep, ka sorkar da rai ko wow pynlait noh neibhah wa ki paidbah hap ki wow lai biang cha ki kaam ki jaam wa iwa emkaam ki man-ka-sngi, heiwa da kyntu u leh wa toh u man kiwa husiar deiwa bood ya ki kyndon wa da phah khamtam wow deiñ ya ki Mask wei wow lai chim yei tika yada.
Da ong u leh wa hadooh katni du i tika iwa ye wow yada wei katwa dang boon kiwa da yoh tika, rap bha ko ya waroh, wei ki paidbah hi toh u rai ki lada kwah ki wow lai bait i im wa man-ka-sngi næ kwah ki wow em biang i chah pynrkhiñ.
U DHS da ong u wa ym em iyi iyi wow tieñ ya i tika neibhah ym em i maa, wei da kyntu u ya ki paidbah wow wan chakhmat ym toh wow ngait yei wym thoh iwa sakhiat.
Chooh chooh u Dr. Aman da ong u wa ka chnat i chait i chait u paitbniah bha ko leh yei long i man cha kiwi ki jylla wei daw pyrchang wow kreh chitom wow yada ya ka jylla nei chah ban biang ha u khñiang khlam.
