Ka seiñ Jaiñtia Students’ Movement, Eastern Region ynne ka sngi hapoh i yahkhmat u President u Wellson R D Siangshai, deiwa emlang u President ka Southern Region, u Skhembhalang Dkhar wa kiwi kiwi de da lai yachem wei da e ki dei thoh cha ki bor wa pait yong ka NHAI, East Jaiñtia Hills wa cha u Deputy Commissioner East Jaiñtia Hills District hajrong i sih palat u sarok NH-6 iwa da ktah hadooh kattæ kattæ yei lai i wan yong ki paidbah heiwa da dap sa du ki thlu tymbud utai u sarokbah.
Neiliang yong ka seiñ da dawa ko wow pynchna noh nadooh Tuber Chohchrieh chadooh Malidor deiwa kdaw leh wa i sih utai u sarok da wanrah i yei ya tyrrah kari khah khah.
Ka seiñ da pynsñiaw ko wa i wym pu dep chna ya ki nala um ha tymbud u NH-6 hapoh ka District khamtam ha ka thaaiñ Wapung, Ladrymbai, Khliehriat wa kiwi kiwi wa khamtam ha ka aiom slap waroh ki jakhlia da tooid ki cha ki sarok iwa da wanrah yei smatung ya ki paidbah wa lai wa wan.
Na ini i daw ka seiñ da dawa ko ya ki bor wa toh u pait wow chimkhia smat ya ini i kaam katwa ye khnang wa ki paidbah ym maad ki yei eh.
Lada ym chimkhia ka seiñ ym yohsa ko wow khang næ phah sangeh ya i lum poisa yong ka NHAI ha Toll Gate kawa em ha Lumshnong.
Neiliang u bru ka NHAI da ong u wa daw chimkhia ya ini i kaam manda duna u slap wei katni daw pyndap chwa da ki mooria.
