Kiwa yahkhmat yong ‘Ka Sur Ki Nong Mawlai’ da pynsawa biang ynne i janmiet ka 6 tarik yei dawa pyndam kreh chipor ya ki heh pulit kiwa emkti wow lai siat ya uwa yahkhmat warim ka HNLC uwa da wan pyndem noh ha u snem 2018, u Cherish Starfield Thangkhiew.
Hawa klam ha ka yalang kawa da leh dei wan pyndem tari, uwa yahkhmat yong ‘Ka Sur Ki Nong Mawlai’, u Donboklang Kharlyngdoh da klam u dei ktien Garo syndon wow pynsñiawthooh ya u Montri Rangbah ya ki dawa yong ki nong Mawlai wow pyndam kreh ya ki heh pulit. Ini i klam yong u Kharlyndoh toh hadien wa ka sorkar hapoh i yahkhmat u Conrad K Sangma wym ap ko ya ini i dawa.
‘Ka Sur Ki Nong Mawlai’ ynne i janmiet da pteiñ ko ya ka yakhih deiwa pynman ya ka Rally næ i lai paidbah na Mawlai Petrol Pump cha Mawlai Mawdatbaki Bus Stand yow pyndem tari. Ini i lai paidbah man ko leh kam wow beiñ yei kam ki pulit wa u Thangkhiew da thmu u wow yaleh pyrchah ya ki pulit da ka tari iwa da pynman ya oo wow chah siat yap u.
U Kharlyngdoh da ong u leh wa ini i kam yong ki pulit toh i wym ye u pdiang wei ka wym ye u ngait neidaw wa u Thangkhiew ym em u yei doh i pran wa chait wa khiah kamtæ ym ye wow ngait wa daw yakhun u da ka tari wa ki pulit kiwa da kieñ tiar bha.
Neiliang u Marbud Dkhar uwa man uwi na kiwa yahkhmat katai ka kynhun, da ong u wa i khut hajir yong ka sorkar lyngba ki bor District man bait ko du wow pyntieñ ya kiwa yahkhmat, wei ha kani ka janmiet ki paidbah da thang ki leh ya ki Show Cause Notice wa da phah da ka yung krehkaam ka Deputy Commissioner.
Da ong u wa ki paidbah nong Mawlai ki lai pyndem ki da ki tari kam i dak pyrchah yei kam ki pulit, ym toh wa pyndem ya ki dawa ka ‘Ka Sur Ki Nong Mawlai’ wa da booh wow yaleh.
