U R. Kamar da iehnoh u kam u Acting Spokesperson ka RAM du hadien 1 tayaw neidaw wa khia palat i kaam. Ka RAM da pyntip ko wa ya u Kamar da jied napyrdi ki 3847 ngut kiwa thap wow yaleh ya ini i kaam, tangwa du hadien chi tayaw wei chwa wow kut i pyrchang wa chi bnai namo ka “1 Month Trial Basis”, da ieh noh u syndet ya i kaam wa da pynkup ha oo. U Kamar da chimkti u ya i kaam na ka D. Mawlong kam ka Acting Publicity Secretary warim ka RAM hadien da yoh kem i chitom.
I thooh wow yoh noh ya ka Publicity Secretary wa pura yong ka seiñ dang pteiñ i hadooh kini ki sngi wei ka seiñ da yoh ko leh ya iwa boon i e yumut na kiwa boon ki seiñ kreh mon sñiawbha na kylleiñ ka jylla Meghalaya wa ka ri. Ka RAM kam ka synjuk ki ‘thei nuti’ da thrang ko dik dik wow yoh noh ya ka Sanjibita McDonald Tariang Sen kawa man kam ka Vice Consul ha ka British Deputy High Commission, Kolkata kam ka Publicity Secretary wa pura ka RAM kamwa da e yumut hi da ka yung krehkaam ka High Commissioner for Human Rights ka UN.
Kam wow kdaw heini wa ha ka 2 tarik uni u bnai, ka seiñ hadien wa da kynjoh ktien ko wa kiwi ki bru chemphang wa ki seiñ waphær waphær, da yohlaad wow yaklam syndon lyngba ka Phone wa ka Michelle Bachelet Jeria, kawa jooh man leh ka President warim ka ri Chile wei kawa man katni kam ka High Commissioner for Human Rights ka UN, wei neiliang yong ka da kular ko ya ka RAM wow yaklam wa ka sorkar India hajrong ini i eh waroh wa maad ki ‘thei nuti ha kani ka jylla, wa ka thaaiñ mihngi ka ri India, wei Jeria da tyrwa ko leh cha ka seiñ yei pyrtuid ka Sanjibita.
