U MLA ka HSPDP na Mawkyrwat uwa man leh u Montri ha ka sorkar MDA, u Renikton L Tongkhar da paan por u na ‘Ka Sur ki Nong Mawlai’ wow syllok chwa para MLA khamtam hapoh ka Regional Democratic Alliance wa emlang ka UDP, hajrong i paan kyrchaan yong kani ka dhab wow dawa beh kreh chipor ya ki pulit wa emkti hei wow siat yap ya u heh warim ka HNLC ha i step ka 13 Naisaphra.
Da ong u wa ini i rai toh iwa emkaam hanla kiwa mihkhmat sñiawkhia ki ya iwa jia neibhah wa ymtoh u jia i, da ong u leh wa kam ki bru wa em i kitkhlieh wow pait ya iwa leh ka sorkar toh iwa bha tam wei ka sorkar ym em u kheiñstiñ ko ya ini wei da thung ko leh ya ka Judicial Inquiry, heiwa da kyntu leh wow yang hadooh wa dadep yoh ya ka bui (Report) takit.
Chooh chooh da ong u wa kam ka seiñ kawa emlang ha ka sorkar ymtoh iwa suk wow chim ya i rai samen næ wow soi ya ka chithi kyrchaan deiwa pynrap leh wa ymtoh iwa miat wow chim ya i rai samen.
U Renikton da ong u wa wot u Montri Rangbah leh da klam che u wa ym chongñia wow chim ya iwon iwon i rai katwa ympu dep ka takit neibhah wa da e por 3 bnai wow pyndep ya ka wei ini ymtoh i por wa slem, heiwa da ong chooh chooh u wa lada ye bha wow chim ya ka rai hadien wa da dep ya ka takit.
