Ka chnat Fisheries ka sorkar Meghalaya deiwa ya krehlang wa ka Division of Animal & Fisheries Sciences, ICAR RC for NEH Region, Umiam ynne ka sngi da pynman ki yei saam symbe dakha namo ka Fish Seed Distribution Mela ha Fish Dale Farm, Directorate of Fisheries, Shillong. Heiwa ka I. Mawlong, Joint Secretary, Fisheries Department da wan ko kam ka kongsan.
I thong kani ka Mela toh yow pyntikna wa ki warep kiwa emkaam yei yarap u yoh ki yei kyrchaan na ka sorkar deiwa yoh ya ki symbe wa miat yow pynmih biang yei dooh nong ki neidaw ka khlam COVID-19. Kiwa yoh myntoi kynthup ki ya ki warep na Khasi, Jaiñtia wa Ri-Bhoi District ka jylla.
Hawa e yei klam, ka I. Mawlong da ong ko wa i psan dakha da man i iwi na ki laad pynmih poisa wa ka sorkar da ban joor bha ko. Deiwa boon ki bru wym yoh kreh, ka sorkar da pynchlur ko ya ki khynroo wow pyrchang ya ki laad kreh ha kani ka chnat lyngba ki Scheme sorkar wa boon. Da ong ko leh wa kiwa psan dakha ym du wa pynmih ki ya ki dakha yow yoh u baam, ki pynmih ki leh yei kreh manda pyneh ki ya ki nan dakha, iwa da e yarap won ya ka imlang sahlang ha kiwa boon ki laad ki luti, da ong chooh chooh ko.
Ka Mawlong da kdaw ko leh wa em ki por manda yoh mynkna ya iwon iwon, ki bru ym jooh kheiñkor ki ya ini, kamtæ da kyntu ko ya ki warep wow kreh chitom yow chim kabu ya kani ka laad yow pynku ya ka i khih i khan yong ki.
Ki symbe dakha wa da saam heini toh kiwa da jied kiwa ye u heh u san hapoh Meghalaya wei kiwa ye leh u chah yei dait thah. Kini ki symbe dakha wa da saam mynkna toh kiwa da e hapoh ka Tribal Sub Plant (TSP) ka ICAR.
Kiwi de ki sahep sorkar kiwa da emlang kynthup ki ya ka A. L. Mawlong, Director of Fisheries, Dr. S K Das, Principal Scientist ICAR, RC NEH Region, ka H. Papang, Superintendent of Fisheries, East Khasi Hills, Shillong najrong kiwi kiwi de.
