U Deputy Commissioner, ka East Jaiñtia Hills District, Khliehriat, u E. Kharmalki, ynne da wai u ya ka Intensified Diarrhoea Control Fortnight (IDCF) 2021 hapoh ka District ha ka yalang wa pynman da ka yung krehkaam u District Medical and Health Officer, ha MCH Building, Khliehriat CHC.
Hawa e yei klam, u Kharmalki, da yaroh u ya kiwa kreh ka chnat wa da pynkreh pura ki ya ki Programme ka sorkar kawa yatoh wa i chait i khiah.
Da ong u wa emkaam wow yoh ya i doh i pran wa khlan wei wow syndong ya i chait i khiah wei wow pait ya ki dak ki chin wei wow lai smat cha ki thaw sumaar lada em chitom.
Da pyntip u leh wa ka Intensified Diarrhoea Control Fortnight (IDCF) toh ka Programme wow yada ya ki khynnah na i pynhiar-kpoh heiwa da kyntu u ya kiwa kreh ka chnat wa ki ASHA wa kamjooh ki Anganwadi wow kreh chitom ki hajrong kani ka bynta.
Neiliang ka Dr. (Mrs) N. P. Suchiang, DIO I/C, East Jaiñtia Hills District, Khliehriat da e ko ya ki kyntien pdiang burom heiwa da ong ko wa ka IDCF toh ka wow pynsñiawthooh paidbah hajrong i khlaad ki khynnah nei pynhiar-kpoh.
Da ban joor ko hajrong i emkaam wow man kiwa leh khooid wei i emkaam wow dih ya ki dawai kam ki dawai Oral Rehydration Salt (ORS) wa Zinc Tablets, u chim yei tika Rota Vaccine wa kiwi kiwi.
Da ong ko leh wa ki ASHA wa ki Anganwadi heipor wa lai ki cha ki yung ki bru toh u saam ki leh ya ki ORS Solution wa ki Zinc Tablet wei da pyntip ko leh wa ha waroh ki Sub-Center hapoh ka District emkaam ki wow em ki ORS Corner wow pynyoo kammon u khleh ya ki ORS.
Kiwi kiwa da klam ha kani ka sngi toh ka S. Dkhar, BEE, Khlieriat CHC, ka Daphihi Passah, Adolescent Health Counselor, Khliehriat CHC wa u Ariston Dhar, District Programme Manager, NHM, East Jaiñtia Hills District.
