Ka kynta kylli wei jubab hapoh ka Yung Dorbar ynne ka sngi ym em pynhun ko ya ka liang pyrchah, khamtam hawa yatoh wa ka chnat Kaam Pohyung, hajrong i jia pdung bomb wa kiwi kiwa da ktah ya i suk i saaiñ ha nongbah Shillong wa ha ka jylla waroh kawi.
Ka MLA yong ka Congress na East Shillong Constituency, ka Dr. M Ampareen Lyngdoh da ong ko wa ka liang pyrchah ym hun ko yei jubab, khamtam hajrong i jia pdung bomb ha Laitumkhrah iwa da jia ha ka 10 tarik u Naisaphra, deiwa pynsñiaw wa ha iwi i liang nadooh wa sdang i ya kylli, u Montri Kaam Pohyung da jubab u yeiwa kylli, wei em leh kiwa ym ye u wow jubab khamtam hajrong i pynyatoh ya i pdung bomb wa u Cherish Starfield Thangkhiew.
Chooh chooh da pynsñiaw yei lynngoh leh wa katwa u Montri dang jubab u yeiwa kylli hajrong i jia pdung bomb, syndet syndet u Lamphang, u Metbah Lyngdoh da pynkynmoo u wa em ki kyndon hawa yaklam hajrong kani ka phang neidaw wa dang em ka takit.
Ka Dr. Ampareen da pynsñiaw ko wa kam ini i leh ym ye wow pdiang hapoh ka Yung Dorbar, wei ka liang pyrchah ym yoh ko yei jubab hadien wa u Montri Rangbah da paan por u neibhah wa dang em ka takit.
